DILI, 12 abril 2023 (TATOLI)—Komisáriu Autoridade Aduaneira (AA/Alfándega), José António Fátima Abílio, hateten, atu kombate atividade ilegál iha Timor-Leste presiza ema hotu nia kontribuisaun.
José António isplika, durante ne’e Governu bandu ema halo atividade ilegál liuliu hatama sasán sira ne’ebé bandu hanesan sigaru ilísitu no seluk tan, tanba ne’e presiza ema hotu nia kontribuisaun atu kombate.
“Fasilidade Alfándega nian iha maibé só iha ba postu integradu sira, ne’ebé bainhira ema hatama sasán ne’ebé Governu bandu liuhosi iha pontu entrada ami bele prende. Maibé ita hatene ita-nia área terestre no marrítima ne’e luan entaun ema halo atividade ne’e liuhosi fatin sira ne’e. Ida ne’e ami labele kontrola atu kombate ho ida ne’e mak presiza ema hotu nia kontribuisaun,” José António dehan ba Agência Tatoli, iha nia knaar-fatin Palásiu Governu, Dili kuarta ne’e.
Nia dehan, Governu estabelese ekipa konjunta ne’ebé involve hosi ministériu relevante sira, maibé ida ne’e mós depende de’it ba informasaun ne’ebé dalaruma tun bele kaptura no dalaruma mós labele.
Komisáriu Alfándega ne’e dehan, ekipa konjunta ne’ebé servisu haree ba atividade ilegál sira mak hanesan, Alfándega rasik, Unidade Patrullamentu Fronteira (UPF), Unidade Polísia Maritima (UPM), no sira seluk tan. Maibé atividade ilegál sira ne’e kontinua tanba menús konsiénsia hosi komunidade.
“Komunidade rasik mak tenke partisipa ba iha kontrolu ne’e, maibé komunidade mak haree atividade ilegál ne’e hanesan oportunidade ida atu hetan osan entaun ita-nia rai susar atu kombate atividade ilegál,” nia dehan.
Difikuldade ne’ebé Alfándega no ekipa konjunta hasoru iha terrenu mak menús fasilidade, rekursu umanu, finanseiru no seluk tan. Sira ne’e hotu difikulta servisu iha terrenu.
“Ita presiza rekursu ne’e, tantu rekusru umanu, finanseiru, fasilidade hanesan transporte hodi halo kontrolasaun ba parte raimaran no tasi. Ba partte tasi tenke iha bero sira nune’e fasilita ita bele halo servisu iha terrenu hodi kontrola atividade ilegál,” nia dehan.
Nia dehan, maske ho difikuldade sira ne’ebé iha, Alfándega kontinua servisu másimu hodi halo kontrolu servisu iha pontu entrada sira.
Jornalista : Arminda Fonseca
Editora : Armandina Moniz
