Brazil deside kondekora Sekretáriu Ezekutivu CPLP Zacarias Albano
DILI, 13 abríl 2023 (TATOLI) – Brazil liuhosi nia Prezidente Luís Inácio Lula da Silva deside através dekretu nomeasaun atu fó kondekorasaun ba Sekretariu Ezekutivu Komunidade Ko’alia Lian Portugés (CPLP-sigla portugés) Zacarias Albano da Costa ho ordem Rio Branco ba servisu relevante ne’ebé presta ona ba nasaun Brasil no CPLP ba “mérito excepcional”.
Kondekorasaun ne’e sei entrega iha sede CPLP iha loron 18 abríl ba Zacarias Albano iha serimónia ida, prezide hosi Embaixadór Juliano Nascimento, loron tolu antes Prezidente Brazil to’o iha Lisboa, Portugal.
Prezidente Lula da Silva mós sei vizita sede CPLP no hasoru malu ho Sekretáriau Ezekutivu Zacarias da Costa iha loron 24 abríl.
“Ha’u sente onra bo’ot ba kondekorasaun ida hosi Brazil mai ha’u”, Zacarias dehan ba Agência TATOLI via media sosial.
Nia hatutan, kondekorasaun ne’e reprezenta rekoñesimentu ba nia servisu nudar Sekretáriu Ezekutivu ba CPLP nian iha tinan rua nia-laran no insentivu atu servisu di’ak liután iha segundu mandatu tinan rua mai.
Zacarias da Costa nudar timoroan ne’ebé sei simu dahuluk kondekorasaun bo’ot ne’e hosi nasaun Brazil.
Notísia relevante : Governu autoriza rekandidatura Zacarias Albano ba mandatu tinan rua-tán
Jornalista: Hortencio Sanchez
Editór : Zezito Silva
