ATAÚRO, 13 abril 2023 (TATOLI) – Responsável Programa iha Postu Saúde MaQuili, Jose Maria de Jesus, informa hosi janeiru to’o marsu, Posto Saúde MaQuili rejista moras Infensaun Vias Respiratóriu Aguda (ISPA) hamutuk 490.
”Durante fulan janeiru to’o marsu, ami rejista ISPA hamutuk 490, husi ne’e janeiru ami rejista hamutuk 150, feverieru 188 no marsu 152”, Jose Maria de Jesus dehan ba TATOLI iha Postu Saúde MaQuili, ohin.
Nia hateten, moras ISPA afeta ba labarik ho idade tinan ida to’o ema adultu.
“Moras ISPA ne’e afeta ba labarik ho idade tinan ida to’o haat, hirak ne’e hamutuk 125, depois husi tinan lima to’o 14 hamutuk 118 no husi tinan 15 ba leten hamutuk 182”, nia esplika.
Nia salienta, bainhira labarik sira afeta moras ispa mai halo tratamentu iha ne’e, sira mai ho mear entaun pesoál saúde sira halo kedas intervensaun to’o rekopera hodi fila ba sira nia-uma.
”Ami mós rejista moras diarea durante fulan tolu iha Postu Saúde MaQuili hamutuk 31″, nia informa.
Moras diarea kauza mai husi labarik sira halimar rai rahun depois sira hemu bee ne’ebé mak la seguru entaun ida ne’e afeta ba hetan moras.
Tuir responsável, ekipamentu médiku sira iha postu saúde MaQuili to’o agora sufisiente hodi halo tratamentu ba popualsaun sira.
”Ami nia medikamentu ekipamentu la iha problema”, nia refere.
Rekursu umanus ne’ebé mak destaka iha Postu Saúde MaQuili hamutuk na’in neen kompostu husi médiku ida, parteira ida, enfermeiru ida, saúde públika ida, kliner ida no programa malaria ida.
Jornalista : Felicidade Ximenes
Editór : Zezito Silva
