CAC notifika Lider Supremu KHUNTO Naimori

DILI, 14 abríl 2023 (TATOLI) – Komisaun Anti-Korrupsaun (CAC,sigla portugés), notifika lider Supremu Partidu Kmanek Haburas Unidade Nasionál Timor-Oan (KHUNTO) José dos Santos Naimori Bucar, ba krime intervensaun ba autoridade públika ne’ebé previstu iha artigu 242 Kódigu Penál Timor-Leste.
“Ita bo’ot sira hatene kazu osan iha aeroportu bainhira pesoál KHUNTO lori atu hola atributu partidu, maibé ita-nia autoridade seguransa sita tanba iha buat balun. Entaun momentu ne’e mosu katak lider Supremu Partidu KHUNTO Naimori deskonfia halo intervensaun ba autoridade públiku, atu justifika ida ne’e krime ka la’e, mak Ministériu Públiku MP delega kompeténsia ba CAC tuir lei, hodi notifika ami nia lider supremu ba krime intervenente ba autoridade públika”, Advogadu Privadu Partidu KHUNTO Isamael Asunção, hateten ba jornalista iha CAC Farol, sesta ne’e.
Nia dehan, iha karta notifikasaun CAC nian ba Naimori, nudar supeitu ba kazu intervensaun ba autoridade públika.
“Iha karta notifikasaun, ninia konteúdu suspeita ami-nia lider supremu ba krime intervenente ba autoridade públika no laiha buat seluk ida”, Ismael informa.
Iha fatin hanesan, Advogadu Privadu Partidu KHUNTO, Arnaldo da Costa Lopes, hateten prenzensa Advogadu nain tolu mai iha CAC atu submete fali karta ba CAC.
“Sim ami nain-tolu nia prezensa iha ne’e reprezenta lider Supremu KHUNTO ne’ebé submete fali karta”, nia adianta.
Nia dehan, José dos Santos Naimori la konsege presta deklasaun, tanba investigadór CAC ne’ebé maka kaer kazu ne’e sei iha impedementu ba nia saúde (moras), tanba ne’e CAC rasik husu ba parte Advogadu KHUNTO atu aprezenta karta informativu.
“Ho nune’e mak investigasaun CAC nian ba lider Supremu Partidu KHUNTO, CAC adia fali ba loron seluk no laiha data determinadu”, Arnaldo da Costa Lopes haktuir.
Tuir observasaun jornalista TATOLI Advogadu Privadu Partidu KHUNTO Ismael Asunção Lopes, Advogadu Privadu Partidu Arnaldo da Costa Lopes no Agostinho de Jesus ne’ebé reprezenta lider partidu KHUNTO Naimori lori karta karta informativu mai CAC iha sesta (14/4) oras tuku haat 9:00 dader ho karreta privadu.
Jornalista: Natalino da Costa
Editór : Zezito Silva

