DILI, 18 abríl 2023 (TATOLI)—Organizasaun Sosiedade Sivíl hanesan Luta Hamutuk no Fórum Organizasaun Naun Governamentál (FONGTIL) husu Partidu Polítiku (PARPOL) sira atu promove dame durante kampaña Eleisaun Parlamentár (ElPar) 2023 ne’ebé sei realiza iha loron 19 abríl to’o 18 maiu.
Tuir Diretór Ezekutivu FONGTIL, Valentim da Costa Pinto, PARPOL sira tenke promove ambiente di’ak iha palku leten tanba tempu kampaña hanesan edukasaun públika ida ba sidadaun hodi kompreende prosesu hotu hodi obedese ba regra sira.
“Entaun Partidu Polítiku sira tenke sai autór atu promove buat di’ak ba sidadaun sira. Ami husu Partidu Polítiku hotu tenke iha kompromisu hodi promove ambiente konduzivu no evita insulta malu iha terrenu, promove dame hodi ko’alia barak liu ba programa no planu sira oinsá mak ita bele hadi’a nasaun ne’e nia vida ba futuru,” Valentim da Costa Pinto, hateten iha salaun FONGTIL, Caicoli, tersa ne’e.
Notísia relevante : CNE-STAE halo edukasaun sívika hodi hasa’e taxa partisipasaun iha ElPar
Nia dehan, bainhira PARPOL sira mak promove ambiente di’ak iha palku leten hanesan oportunidade di’ak atu kovense sidadaun sira hodi kompreende ho maduru hodi hili líder ne’ebé sira prefere tanba hatudu nia responsabilidade ba nasaun.
“Partidu hotu tenke fó liberdade no ko’alia ho sidadaun hotu hodi konvense ho di’ak tanba ida ne’e hanesan parte edukasaun polítika. Ita husu partidu polítiku sira iha tempu kampaña labele ko’alia situasaun pasadu sira tanba Timor tenke iha kondisaun estabilidade polítika di’ak hodi serbí povu, nune’e ita labele moris iha situasaun krize polítiku,” nia fó hanoin.
Iha fatin hanesan, Diretór Ezekutivu Luta Hamutuk, José Alves da Costa, kongratula PARPOL 17 ne’ebé mak iha direitu kompete iha ElPar 2023 no iha biban ne’e husu iha tempu kampaña labele insulta malu maibé respeita ema idaidak ninia privasidade.
“Partidu polítiku sira tenke hatene no konsidera katak kampaña ne’e hanesan edukasaun populár ne’ebé nakonu ho fraternizasaun, armónia, domin no pás. Ita tenke hanoin katak Partidu Polítiku sira bele diferente maibé objetivu ida de’it, katak bainhira hetan podér karik atu hadi’a povu nia moris ba kondisaun prósperu. Entaun Luta Hamutuk sujere partidu polítiku sira iha palku leten tenke promove planu, estratejia no programa tinan lima mai,” Diretór ne’e hameno.
José Alves dehan bainhira PARPOL sira ko’alia programa no planu di’ak iha palku ida mak sei eduka povu atu hili líder bazeia ba programa no planu furak.
“Bainhira iha palku leten mak ita insulta malu hasai liafuan kroat ba malu, ida-ne’e koko hafera ita-nia unidade nasionál,” nia tenik.
Jornalista : Arminda Fonseca
Editora : Julia Chatarina
