DILI, 18 abríl 2023 (TATOLI) – Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno simu vizita kortezia hosi Konsul Onoráriu Timor-Leste ba Japaun, Kitahara Iwao.
Iha sorumutu ne’e, Kitahara hato’o agradesimentu ba Ministra Magno ho delegasaun hosi Timor-Leste, ne’ebé partisipa ona iha serimónia funerál Estadu eis Primeiru-Ministru Japaun nian, Shinzo Abe, iha fulan setembru tinan kotuk.
“Hasoru malu ne’e, parte rua diskute mós oinsá atu hametin liután kooperasaun bilaterál liuhosi programa no apoiu sira ne’ebé daudaun ne’e implementa hela iha rai-laran”, renik liuhosi komunikadu ne’ebé Agência TATOLI asesu foin lalais ne’e.
Hanesan Timor-Leste nia parseiru dezenvolvimentu, Japaun komprometidu atu sai belun di’ak ho Timor-Leste no mantein fó apoiu ba Timor-Leste nia prosesu dezenvolvimentu, partikularmente apoiu ba Timor-Leste nia preparasaun no adezaun ba ASEAN hanesan membru plenu.
Governu Japaun sei kontinua fo apoiu ba Timor-Leste iha área edukasaun, saúde, reabilitasaun, defeza no agrikultura.
Jornalista: Hortencio Sanchez
Editór : Zezito Silva
