Iha Bobonaro, sentru votasaun 42 la asesu enérjia elétrika no laiha edifísiu públiku
MALIANA, 19 abríl 2023 (TATOLI)-Diretór Sekretariadu Tékniku Administrasaun Eleitorál (STAE), Munisípiu Bobonaro, Mariano Viegas Amarál, fó-sai katak, sentru votasaun 42 seidauk asesu enérjia elétrika no sentru votasaun balun laiha edifísiu públiku.
“Ami-nia levantamentu ne’ebé halo sentru votasaun 42 mak la asesu eletrisidade, agora sei menus ka lae,” Mariano Viegas Amaral, ko’alia iha Bobonaro, kuarta ne’e.
Nia dehan, munisípiu Bobonaro estabelese ona sentru votasaun 150 no estasaun votu 170 atu halais prosesu kontajen votu, tanba esperiénsia iha eleisaun sira ba kotuk iha fatin balun halo kontajen to’o tuku 03:00 dadeersan.
Hosi totál sentru votasaun ne’e, iha sentru votasaun 15 mak laiha edifísiu públiku, hanesan sede aldeia, sede suku no eskola.
“Ida-ne’e ita loke de’it tenda ka lona, halo koordenasaun ho xefe aldeia ho nai xefe suku sira,” Mariano dehan.
Nune’e mós iha sentru votasaun balun mós seidauk asesu enérjia elétrika, maske hato’o ona pedidu ba Eletrisidade Timor-Leste, Empreza Públika.
Pedidu ne’e STAE Bobonaro hato’o hafoin Prezidente Repúblika, José Manuel Ramos Horta, dekreta kalendáriu kampaña eleitorál no loron eleisaun.
“Ami-nia levantamentu ne’ebé halo sentru votasaun 42 mak la asesu eletrisidade,” Mariano haktuir.
Enkuantu iha sentru votasaun fatin 36 mós seidauk asesu estrada, maibé meiu ne’ebé STAE sei uza mak hatún matéria sensitivu no la’ós-sensitivu, selu komunidade lalin, akompaña ho membru Polísia to’o fatin votasaun.
Lbele konsidera eleisaun parlamentár hanesan jogu futeból
“Ha’u hanoin katak eleisaun ne’e la’ós jogu Futeból, ne’e vida nasaun nian, halo favór iha eventu eleisaun ida, ita labele taru osan, tanba ita taru osan kuandu lakon, bele hamosu problema. Sé problema ne’e mak entre ida taru ho taru ne’e la buat ida, maibé kuandu fó sala fali órgaun implementadór mós ladún di’ak ida,” nia fó hanoin.
Nia husu ba lideransa partidu polítiku sira atu fó hatene ba militante no apoiante sira katak eleisaun ne’e atu hili reprezentante hodi hahoris Governu, la’ós hanesan kompetisaun jogu Futeból.
Nia dehan, xave mportante liu mak fiskál partidu idak-idak tenke tuir formasaun molok halo atividade iha sentru votasaun.
Notísia relevante: STAE Bobonaro hahú halo espozisaun lista eleitór iha suku 5
“Prosesu tomak ne’e sira tenke akompaña, hahú hosi verifikasaun buletin, distribuisaun materiál sensitivu no la’ós-sensitivu ba sentru votasaun to’o kontajen remata mak ita-bot sira foin fila. Sé lae materiál to’o ba la haree, prosesu hahú tuku 06:00, mai tarde mak halo krítika fali, ne’e ladún loos,” nia apela.
Notísia relevante: STAE Bobonaro selesiona hela konkorrente ofisiál eleitorál 2,899
Jornálista: Sérgio da Cruz
Editór: Evaristo Soares Martins
