DILI, 25 abríl 2023 (TATOLI)—Komisaun Nasionál Eleisaun (CNE, sigla portugés) planeia ona hodi organiza debate ho partidu polítiku 17 ne’ebé daudaun halo hela kampña no sei konkorre iha Eleisaun Parlamentár 2023.
Prezidente CNE, José Belo, hateten, tema ba debate mak ‘konseitu dezenvolvimentu juventude no feto partidu polítiku’.
“Debate ne’ebé sei realiza ho asuntu espesífiku liu kona-ba feto tanba iha rai barak feto mós porsi ida di’ak iha vida polítika. Bainhira ami partisipa konferénsia ida iha Áfrika Súl, Timor-Leste iha pozisaun boot tebes tanba númeru partisipasaun feto liuliu nu’udar membru Parlamentu Nasionál ne’e barak, entaun se ita hetan previleiju hosi ema ita rasik tenke fó mós biban ba maluk feto sira liuliu joven. Tanba ne’e ami hakarak sira ne’ebé tama iha lista Parlamentu mak partisipa debate,” Prezidente CNE informa iha ámbitu reuniaun ho partidu polítiku sira, iha salaun CNE, Caicoli, tersa ne’e.
Nia konsidera, debate ne’e bele fó biban ba joven feto sira hodi ko’alia perspetiva no leitór bele hili partidu preferénsia.
Orgaun eleitorál ne’e hili pesoál partidu ne’ebé naran tama Parlamentu Nasionál ho hanoin debate períodu ne’e nu’udar oportunidade.
“Ho palku ida-ne’e sira bele iha oportunidade. Ita ko’alia kona-ba konseitu tranzisaun jerasionál, ko’alia mós kona-ba konseitu dezenvolvimentu juventude sira ka feto nian ba kontinuasaun liliu kona-ba Timor iha futuru. Tanba ne’e, situasaun ne’e diferente ho debate sira uluk liubá, ne’ebé ba de’it líder partidu maibé iha tinan ne’e oferese tan palku atu sira bele esplika no hatudu papél fó matéria ne’ebé di’ak hodi muda joven no populasaun tomak, nune’e iha tempu eleisaun bele fó votu ba sira,” nia esplika.
Notísia relevante : CNE disponibiliza reprezentante partidu domina asuntu partisipa iha debate
Alende ne’e, liuhosi debate ne’e públiku bele koñese kandidatu feto no juventude hosi partidu polítiku. Durante ne’e joven sira iha de’it líder másimu iha sira-nia kotuk maibé liuhosi debate ida-ne’e CNE no Rádiu Televizaun Timor-Leste, Empreza Públika (RTTL, E.P) bele promove juventude partidu sira atu públiku koñese di’ak liután.
“Debate nu’udar espasu ka fatin kandidatu sira atu introdús sira-nia biografia no koñesimentu ba prinsípiu demokrasia, povu mak ukun, povu mak eleje poder no poder hodi hadi’a povu-nia moris inklui promove igualdade jéneru iha debate tanba ne’e maka debate kada partidu reprezenta hosi ema na’in-rua katak feto ida no mane ida,” nia salienta.
Debate ne’e sei realiza iha loron 27 no 28 abríl iha Auditóriu Muzeu Rezisténsia, ne’ebé debate ne’e la’ós transmisaun direta maibé halo de’it gravasaun hosi RTTL, E.P. Debate ne’e organiza hosi CNE no RTTL, E.P no Kontiudu tomak hosi debate responsabiliza hosi CNE, enkuantu RTTL responsabiliza tékniku, halo gravasaun no publikasaun.
Moderadora mak Titi Ribeiro, Koko Valente, Paula Rodrigues, António Dias, Espedito Dias.
Enkuantu, pergunta ba debate hetan hosi Instituisaun Estadu relevante, Universitáriu, Sosiedade Sivíl no hosi CNE rasik. Aleinde sira fornese pergunta sira mós fornese dadus bazeia ba peskiza. La’ós moderadór sira de’it mak halo pergunta maibé eleitór sira mós hato’o pergunta liuhosi vídeo gravasaun ne’ebé prepara ona.
Kontíudu pergunta la ses hosi kompeténsia Governu, defeza no seguransa, ekonomia, sosiál, infraestrutura, relasaun externa, justisa, labarik ho inkluzaun, edukasaun no saúde.
“Partidu hamutuk 17 entaun loron ida halo gravasaun dala-tolu, kada epizode partidu tolu tanba ne’e presiza loron rua hodi konklui gravasaun, autoriza partidu polítiku lori apoiante másimu na’in-lima tanba espasu fatin la sufisiénte, sei marka partisipa mos instituisaun Estadu sira no sosiedade sivíl,” nia tenik.
CNE no RTTL, E.P sei hodi deside loron no oras hodi fó sai, no sei publika dala-rua ne’ebé kada epizódiu, CNE garante laiha korte.
Jornalista : Antónia Gusmão
Editora : Julia Chatarina
