DILI, 25 abríl 2023 (TATOLI)—Organizasaun Naun Governamentál (ONG), La’o Hamutuk, tersa ne’e, realiza semináriu ho tema ‘alternativa dezenvolvimentu hafoin mina’, atu fahe informasaun ba públiku kona-ba problema sosiál ne’ebé akontese ka sai preokupasaun ba nasaun.
“Objetivu realiza semináriu, tinan ne’e sei tama ba Eleisaun Parlamentár, entaun antes to’o ne’ebá ita realiza semináriu hodi fó hanoin ba públiku hodi halo diskusaun kona-ba problema sosiál ne’ebé akontese ka sai preokupasaun ba nasaun, nune’e ukun-na’in sira bele hatene saida mak bele halo hodi rekupera ekonomia hafoin mina maran,” Koordenadora no Peskizadora La’o Hamutuk, Marta da Silva, hateten, iha salaun Katedral Vila-Verde.
Liuhosi diskusaun ne’e, fó hanoin ba malu relasiona ho problema sosiál tanba Timor-Leste agora tama ona ba rai-naruk fiskál. Tanba ne’e Governu presiza rekupera ekonomia no dezenvolvimentu sustentável.
“Bainhira ita-nia mina laiha ona, Governu, setór privadu no empreza sira presiza hanoin saida mak sei halo hodi asegura ekonomia ba oin. Tanba ne’e mak agora sai preokupasaun públiku,” nia akresenta.
Notísia relevante : La’o Hamutuk apresia proposta-lei grande opsaun planu tinan 2023
Iha semináriu ne’e, oradór sira fó hanoin ba partisipante sira, molok deside fó votu ba partidu polítiku iha Eleisaun Parlamentár iha loron 19 maiu, tenke deside didi’ak, haree planu no programa klaru nune’e bele lori nasaun ba oin.
“Ita hotu hatene daudaun preokupasaun públiku sira mak hanesan edukasaun, saúde, infraestrutura no sira seluk, nune’e ita tenke haree lai mak fó votu,” nia akresenta.
Iha fatin hanesan, Prezidente Asosiasaun Emprezariál Mulher Timor-Leste, Hergui Luina Fernandes Alves, hateten, atu diversifika ekonomia no alternativu hafoin mina maran, Timor-Leste tenke investe iha pilár haat hanesan agrikultura, turizmu, peska no prosesamentu ka manufatura.
“Ha’u-nia espetativa mak parte hotu hatene ninia responsabilidade karik mina maran bele haree kondisaun hotu, tantu Governu prepara di’ak liután kondisaun sira hodi ajuda setór privadu no ita-nia produsaun rai-laran, tanba hosi sira ne’e mak ita diversifika ekonomia,” nia dehan.
Jornalista : Arminda Fonseca
Editora : Julia Chatarina
