UNDERTIM husu ba negosiante iha Largo Lesidere atu vota ba númeru sorteiu 10
DILI, 25 abríl 2023 (TATOLI) – Prezidente Partidu Unidade Nasionál Demokrátika Rezisténsia Timorense (UNDERTIM) Francisco Guterres, husu ba ba negosiante ambulante sira iha Largo Lesidere atu vota ba númeru sorteiu 10 hodi bele kaer Governu no bele tau matan liuhosi kriasaun ba kondisaun ne’ebé dignu.
“Ami mai iha Largu Lesidere ida ne’e atu husu ba joven no negosiante sira karik vota ba UNDERTIM hodi liu bareira mak sei modifika ita-nia fatin ida ne’e ho dignu, halo ho vidru atu turista sira mai karik bele buka hahan iha Largo Lesidere, entaun ida ne’e mak ami kompromete hela ba sira”, Prezidente UNDERTIM Francisco Guterres, dehan bainhira halo mini kampaña no fahe brosura iha Largo Lesidere, ohin.
Nia informa, haree ba kondisaun Largo Lesidere ladún di’ak, tanba ne’e bainhira UNDERTIM manan sei hadia didiak, instala internet gratuitu ba estudante sira ne’ebé mak mai estuda iha fatin refere.
“Bainhira ami mai iha ne’e haree Largo Lesidere ladún di’ak maibé karik UNDERTIM manan sei hadia internet atu estudante sira mai iha ne’e uza ho gratuitu hodi aumenta sira nia kapasidade liuhosi estudu oioin”, nia afirma.
Nia esplika, bainhira UNDERTIM manan mak sei hadia liután Jardim Largo Lesidere ba turista sira husi internasionál bele mai vizita.
Mini kampaña ne’e hetan seguransa másimu husi Polísia Nasionál Timor-Leste liuhosi eskuadra Cristo Rei no Supervisiona husi Komisaun Nasionál Eleisaun (CNE).
Jornalista : Felicidade Ximenes
Editór : Zezito Silva
