Governu halo poupansa millaun $2 ba kombustível no manutensaun karreta Estadu
DILI, 27 abríl 2023 (TATOLI)–Ministériu Finansa (MF) halo poupansa orsamentu despeza públika ho valór millaun $2 ba kombustível no manutensaun karreta Estadu tanba aplikasaun jestaun di’ak.
“Dadus ikus levantamentu veíkulu Estadu hatudu katak hahú hosi tinan 2002 to’o 2020, Governu Timor-Leste gasta ona millaun $125 hodi sosa karreta Estadu foun hamutuk 3.415 unidade,” relata nota ne’ebé Agência Tatoli asesu, kinta ne’e.
Despeza ne’e halo orsamentu Estadu hetok a’as tebes no dezvia despeza ne’ebé tuir loloos aloka ba setór produtivu sira hodi dudu kresimentu ekonómiku.
Fasilidade karreta Estadu ne’e, ein vez de rezulta ba kresimentu iha prestasaun servisu ba públiku a’as maibé infelizmente hatodan fali kapasidade finanseira Estadu.
Notísia relevante : Veíkulu Estadu 615 tama lista patrimóniu atu halo leilaun
Ho razaun ne’e mak iha setembru 2021, VIII Governu Konstitusionál introdús polítika foun liuhosi aprovasaun dekretu-lei kona-ba subsídiu transporte hodi transforma kustu operasionál karreta Estadu ba subsídiu transporte.
“Ida-ne’e nu’udar meiu ida atu hakbiit kapasidade funsionáriu públiku ba despeza transporte no atu hamenus kustu sosa karreta foun inklui sosa kombustível no manutensaun,” haktuir.
Antes ne’e, atu mellora jestaun veíkulu ne’ebé rigorozu, Governu mós aprova ona Rezolusaun Governu númeru 130/2021 kona-ba jestaun no realokasaun karreta Estadu ne’ebé regula no kria kondisaun sira atubele reforsa jestaun ne’ebé efisiente no rigór liután atu nune’e bele kontribui ba efisiénsia no rasionalizasaun ba gastu karreta Estadu.
Aleinde ne’e, Governu aprova projetu dekretu-lei kona-ba regulamentu veíkulu Estadu no alterasaun dahuluk ba dekretu-lei númeru 21/2021, loron 10 novembru, ne’ebé kria ona subsídiu mensál transporte.
Projetu dekretu-lei ne’e ho objetivu atu estabelese norma kona-ba akizisaun, rejistu afetasaun, jestaun, uza, atribuisaun, manutensaun, reparasaun, monitorizasaun, fiskalizasaun, abatimentu, inklui alienasaun veíkulu Estadu.
Alterasaun ne’e ho hanoin atu halo ajustamentu balun ba dekretu-lei númeru 21/2021, loron 10 novembru, liuliu atu define pagamentu subsídiu mensál ba transporte, nune’e bainhira suspende karik atribui fins pesoál ba benefisiáriu veíkulu Estadu, hosi data produsaun efeitu atribuisaun nian to’o data remata.
Jornalista : Antónia Gusmão
Editora : Julia Chatarina
