DILI, 28 abríl 2023 (TATOLI)—Komandu Polísia Nasionál Timor-Leste (PNTL) munisípiu Liquiçá, kinta ne’e, halo apreensaun motorizada haat hosi militante partidu Os Verdes de Timor, iha munisípiu Liquiçá.
“Iha kinta ne’e, iha postu administrativu Liquiçá, munisípiu Liquiçá realiza kampaña, iha militante partidu Os Verdes la’o ho motorizada kanu racing, la uza kapasete, entaun Polísia halo apreensaun no aplika multa hodi ba selu iha banku molok foti fali sira-nia motorizada,” Portavós Komandu PNTL, Superintende Xefe Polísia, Arnaldo Araújo hateten liuhosi konferénsia imprensa, iha Kuartel Jerál PNTL, Caicoli, sesta ne’e.
Notísia relevante : PNTL halo apreensaun ba motór adeptu Argentina 20 no karreta ida
Superintende Xefe Polísia dehan motorizada sira daudaun iha hela Eskuadra PNTL Liquiçá, bainhira sira selu tiha koima mak bele entrega.
“Daudaun sei iha hela komandu Polísia Liquiçá, tempu badak lori ba Ministériu Públiku hodi bele selu koima,” nia tenik.
Tuir oráriu kampaña ne’ebé fó sai hosi Komisaun Nasionál Eleisaun (CNE, sigla portuges), Partidu Os Verdes de Timor halo kampaña iha kampu Liquiçá.
Jornalista : Antónia Gusmão
Editora : Julia Chatarina
