FRETILIN sei kria kondisaun dignu ba Forsa Armada
MALIANA, 29 abríl 2023 (TATOLI)-Prezidente Ko-Troika, Tito Cristovão ‘Lere Anan Timur’, promete bainhira povu fó fiar ba Frente Revolusionária Timor-Leste Independente (FRETILIN) iha eleisaun parlamentár, kria kondisaun dignu ba FALINTIL-Forsa Defeza Timor-Leste (F-FDTL) atubele kontinua asegura soberania nasaun.
Tenente jernerál reformadu hato’o promesa ne’e durante hala’o intervensaun polítika iha atividade kampaña eleitorál ho tipu komísiu ne’ebé realiza iha kampu futeból Maliana vila, munisípiu Bobonaro, sábadu ne’e.
Nia parte koñese kondisaun Forsa Armada no Polísia Nasionál Timor-Leste, tanba komanda Forsa Armada tinan 20-resin.
Notísia Relevante: FRETILIN hakarak hametin unidade nasionál hala’o dezenvolvimentu iha TL
“Ita-nia Forsa Armada atu kumpri didi’ak ninia misaun, primeiru bein-estár, sira tenke moris di’ak, sira-nia família tenke moris diak, iha uma ida-ne’ebé dignu, tanba ita-nia forsa kuandu funu ruma ita mak dudu sira mak ba, ninia feen ho oan hein hela fila ka la fila, tanba ida-ne’e FRETILIN kuandu ukun tenke haree mós situasaun forsa armada atu kumpre didi’ak ninia misaun,” Lere afirma.
Lere husu ba militante no simpatizante ne’ebé namkari iha territóriu nasionál atu fó konfiansa ba FRETILIN nune’e bele implementa planu refere hodi kria kondisaun ba Forsa Armada.
Maibé lere akresenta, atu atinje planu sira-ne’e, presiza líder istóriku sira tuur hamutuk, tanba partidu hotu-hotu ukun mós sei labele halo milagre ba povu, maibé milagre ne’e bele akontese só iha unidade nasionál.
Notísia relevante: http://FRETILIN hakarak hadi’a sistema edukasaun inkluzivu no kampu serbisu
Jornalista: Sérgio da Cruz
Editór: Evaristo Soares Martins
