ERMERA, 30 abril 2023 (TATOLI) – Partidu istóriku FRETILIN hato’o kompromisiu politika atu tau prioridade ba dezenvolvimentu kafé iha munisípiu Ermera bainhira povu fó fiar hodi kaer ukun iha IX Governu Konstitusionál.
Iha Kampaña Eleitorál FRETILIN nian iha munisípiu Ermera, Sekretariu Jerál Partidu istóriku FRETILIN, Mari Alkatiri kompromete atu foku ba prioridade rua iha munisípiu – dezenvolvimentu “Kafé Hibridu’ no ‘Dezenvolvimentu Estrada.”
“Entaun, iha agrikultura ita atu dezenvolve kafé iha Ermera. Saida mak ita tenke halo tan ba kafé, kafé ita nian ne’e ita atu dehan tuan ona. Presiza ita atu kuda kafé foun. Kuda kafé foun la’ós kafé foun de’it maibé kafé ida bele produtivu liu ne’ebé mak ita bolu ‘Hibridu Timor.’
Líder másimu ne’e hateten ‘Hibridu Timor’ hahú ona ho programa balun maibé seidauk to’o no tenke aumenta tan para hasa’e produasaun boot liután. “Ne’e mak ita tenke halo iha Ermera.”
Mari Alkatiri mós hateten presiza mós fó prioridade ba infraestrutura munisípiu Ermera.“Kafé folin de’it la to’o, entaun tenke iha mós estrada atu lori kafé ba merkadu tantu internu no internasionál. Se laiha Estrada hanesan agora, udan-boot uitoan estrda kotu, nee ekonomia la la’o,” Líder timoroan ne’e esplika.
Tanba ne’e, Sekretáriu jerál Partidu FRETILIN, Marí Alkatiri dehan, prioridade rua ba Ermera mak ne’e ‘hadia didi’ak kafé, maibé labele limita de’it iha kafé maibé infraestrutura mós.
“Kafé iha dalan rua para atu bele hetan rikeza, ida kafé órganika ne’e fa’an duni hanesan kafé, no ida seluk kafé komersiál ita uza ba halo buat barak; bele halo minuman (bebida) oioin de’it. Kafé bele halo ba buat barak, tanba nee ita bolu Cadeia de Valores,” líder ne’e akresenta.
Kafé ida ne’e ne’ebé mak faan ho folin diak tenke kafé ida ne’ebé mak iha kualidade diak hanesan Kafé Lakuten.’“Ita fa’an kafé ida folin sa’e ne’e só kafé ida kualidade. Buat ida importante ba kafé agora ne’e mak kafé lakuten, maibé laiha ona. Ne’e labele no ita tenke haki’ak fali Laku. Laku ne’e la’ós na’an atu han maibé atu fó kafé diak ba ita. Tanba ne’e mak ita dezenvolve kafé mas tenke iha dezenvolvimentu integradu ida hanesan ifraestrutura, bee moos no seluktan.
Alende kafé, iha kampaña refere, FRETILIN, partidu ne’ebé hola parte mós iha Governu Konstitusionál daualu ne’e mós hakarak dezenvolve bee moos ba komunidade tomak iha Timor-Leste.
“Bee moos ne’e importante ba ita Timor-Leste tomak. Ne’e signifika programa jerál ba Timór tomak. Ita hare agora ita ba iha ne’ebé de’it husi aldeia ba to’o suku ema halerik ba bee moos. Halerik ba mos siginifika ita tenke iha kapasidade atu fó bee moos ba uma-kain ida-idak hahú husi ne’ebé deit mas Ermera mos persiza,” Alkatiri subliña.
Nia reiteira katak, ba Ermera, kafé importante liu maibe tenke buka atu kuda mos produtu sira seluk: “Labele hein deit to kafé atu funan ona mak ita atu moris. Ita tenke diversifika agrikultura no diversifika ekonomia.”
Sekretáriu Jerál ne’e mós hato’o kompromisu FRETILIN nian atu kontinua ho programa sira ne’ebé mak lori ona benefísiu no Naroman ba povu hanesan – Uma Naroman Ba Povu, Subsídiu Fim do Ano, Cesta Bazika no seluktan.
Jornalista : Filomeno Martins
Editora : Nelia Borges
