ATAÚRU, 01 maiu 2023 (TATOLI)- Partidu Congresso Nacional da Reconstrução Timorese (CNRT) sei transforma munisípiu Ataúru sei sai zona administrasaun espesiál.
Sekretáriu ezekutivu Partidu CNRT, munisípiu Dili, Ricardo Batista garante, sei transforma munisípiu Ataúru sai zona espesiál ida hodi hala’o dezenvolvimentu ho kapasidade Ataúru-oan rasik.
“Agora Ataúru sai ona munisípiu maibé la’ós zona espesiál maibé hanesan hela munisípiu sira seluk,’’ Sekretáriu ezekutivu Partidu CNRT munisípiu Dili, Ricardo Batista dehan, iha atividade mini kampaña partidu CNRT iha suku Maquili, segunda nee.
Nia hatutan, CNRT sei la taka munisípiu Ataúru no sai fali postu administrativu, maibé CNRT sei transforma munisípiu Ataúru sai zona espesiál ida atu jere rasik dezenvolvimentu zona Ataúru nian. Tuir Estadu munisípiu Ataúru la klasifika munisípiu Ataúru hanesan zona espesiál ida, maibé hanesan munisípiu baibain ida.
Partidu CNRT komprometidu atu hadi’a liutan povu munisípiu Ataúru iha tinan lima mai, liuhusi transformasaun munisípiu Ataúru sai zona espesiál ida.
“Ita rekoñese katak Oitavu Governu hahú ona hala’o dezenvolvimentu munisípiu Ataúru hanesan Bee mós, Eletrisidade no Estrada, maibé CNRT sei fó apoiu tomak ba Ataúru-oan rasik mak sei hadi’a liutan programa importante sira ba povu nia moris di’ak,’’ nia hateten.
Kriasaun munisípiu Ataúru husi Oitavu Governu iha 2021, CNRT mós hola parte iha aprovasaun iha Parlamentu Nasionál, tanba ne’e partidu CNRT mós apoiu ba povu Ataúru nia moris di’ak.
Koordenadór Partidu CNRT munisípiu Ataúru, José Batista, hateten, Partidu CNRT sempre tau prioridade ba programa sira ne’ebé fó moris di’ak ba povu hotu.
“Ita sempre fó votu a favór iha Parlamentu Nasionál ba programa bein-estar povu nian, tanba ne’e ita sei hadi’a povu nia moris bele sai moris ida dignu,’’ nia subliña.
Alende ne’e, CNRT sei hadi’a liña merkadu hodi apoiu produtu lokál husi munisípiu Ataúru ba iha merkadu nasionál. Partidu CNRT sei normaliza mós folin sasán iha munisípiu Ataúru tantu iha nasionál atu povu Ataúru tomak iha kbiit bele sosa nesesidade báziku hodi responde moris.
Tuir dadus husi Koordenadór Jerál partidu CNRT iha munisípiu Ataúru hamutuk liu rihun hitu.“Ita husu ba militante no simpatizante partidu CNRT iha munisípiu Ataúru bele vota ba Partidu CNRT no númeru sorteiu 12,’’ nia apela.
Ida atividade diálogu nee akompaña husi CNE munisípiu Atauru, partisipa husi autoridade lokál no apoiu seguransa husi membru Polisia Nasionál Timor-Leste (PNTL), Munisípiu Ataúru.
Jornalista: José Belarmino De Sá
Editora: Nelia Borges
