Governu aumenta partisipasaun asaun iha Timor Telecom ba 77,65%
DILI, 03 maiu 2023 (TATOLI)—Governu Timor-Leste liuhosi Ministru Finansa, Rui Augusto Gomes no reprezentante empreza Oi hosi Brazíl, Luís Rosa, kuarta ne’e, asina akordu sosa no fa’an partisipasaun asaun 57,09% hosi operadór telekomunikasaun Timor Telecom ho montante millaun $21,1.
Ministru Finansa, Rui Augusto Gomes, relata, antes ne’e, partisipasaun Timor-Leste iha Timor Telecom 20,58%, maibé asina akordu ne’e atu sosa asaun hosi empreza Oi ho 57,09%, maka daudaun Timor-Leste iha partisipasaun maioritária 77,65%.
“Ho ida-ne’e ita sai asionista ba partisipasaun asaun ne’e no ita mak sei halo kontrolu barak liu, nune’e tenke iha ema ne’ebé ho kapasidade hodi haree ba asuntu ne’e,” Ministru hateten iha ámbitu asina akordu, iha salaun Ministériu Finansa, Aitarak-laran, kuarta ne’e.
Hafoin asina akordu ne’e, Governu sei halo auditoria partisipasaun asaun hodi buka tuir saida mak presiza halo investimentu tanba ba oin Governu mak sei sai na’in ba operadór telekomunikasaun ne’e.
“Kontratu ne’ebé ba oin ita sei kontinua halo mak Timor-Leste sei sai asionista boot iha Timor Telecom hosi 20,59% sa’e ba 77,65% hosi kapitál sosiál. Aspetu negósiu ne’e, ho nia valór totál millaun $5,44, ida-ne’e permite Timor-Leste asume kontrola ba empreza hodi hasa’e kapasidade influénsia, eskolla estratejia empreza, inklui konta lejítima espetativa hosi asionista asaun oituan,” governante ne’e akresenta.
Notísia relevante : KM autoriza despeza millaun $21,1 hodi aumenta partisipasaun iha Timor Telecom
Tuir Ministru, durante ne’e empreza Timor Telecom la halo investimentu boot iha Timor-Leste tanba reseita ne’ebé iha fó hosi grupu Oi, maibé bainhira Estadu Timor-Leste sai ona asonista maka reseita mós sei tama ba kofre Estadu.
“Aspetu negósiu ida-ne’e ho nia valór millaun $15,67, hatudu katak sei lori Timor-Leste ba tempu médiu no tempu naruk inklui dívida la prejudika ba atividade Timor Telecom,” nia dehan.
Aleinde ne’e, kapitál empreza ne’ebé sa’e daudaun millaun $8,15 no totál no dívida hamutuk millaun $19,86, ho ida-ne’e ba tranzasaun ho valór globál millaun $21,11, opsaun polítika no estratejia bele aproveita kritéria rasionál ba finanseiru.
“Daudaun ne’e Timor-Leste sei iha tusan ba Timor Telecom maizumenus millaun $3, antes ne’e selu ona millaun $5 maibé ba oin sei selu hotu,” Ministru tenik.
Iha fatin hanesan, Reprezentante Timor Telecom iha Timor-Leste, Júlio Alfaro, hateten, inisiativa ne’e hodi mellora di’ak liután servisu telekomunikasaun.
“Ho prezensa Telemor no Telkomcel, fó impaktu ba investimentu Timor Telecom desde iha tinan 2002. Nune’e, bainhira Governu Timor-Leste sosa ona partisipasaun asaun boot hosi Timor Telecom hosi Brazíl no Portugal, ba futuru bele fasilita di’ak liután servisu sira,” nia otimista.
Ho akordu ne’ebé halo ona, Brazíl no Portugal la sai ona asionista maibé Timor-Leste mak sai asionista boot liu ba asaun ne’e, kontinua empreza hosi Macau no empreza Timor-Leste rasik.
Antes ne’e, Timor Telecom maioria kontrola hosi Telekomunikasaun Públika Timor (TPT) SA, ne’ebé Oi Brazíl ho kapitál 76%, partisipasaun SGPS 3,05%, Fundasaun Harii-Sosiedade ba Dezenvolvimentu Timor-Leste (Dioseze Baucau) 18% no Fundasaun Oriente 6%.
Asionista iha Timor Telecom antes ne’e kompostu hosi TPT SA (54,01%), Estadu Timor-Leste (20,59%), VDT Holding Limited (17,86%), Júlio Alfaro (4,49%) no PT Participações SGPS SA (3,05%).
Jornalista : Arminda Fonseca
Editora : Julia Chatarina
