DILI, 05 maiu 2023 (TATOLI) – Estadu Unidu Amérika (EUA) no Governu Timor-Leste asina ona akordu atu atribui bolsa estudu ba estudante timoroan na’in-tolu hodi kontinua sira-nia mestradu iha edukasaun iha 2023.
Xefe Asuntu Públiku Embaixada Amérika iha Timor-Leste, Tim Johnson, hatete timoroan na’in-tolu mak sei hetan oportunidade bá kontinua mestradu, liuhosi programa Fulbright. “Espera katak fundu ne’ebé prevee ona ba programa ne’e sei aumenta iha tinan haat oin mai, tanba nasaun rua ne’e kontinua ho esforsu hodi habelar tan fornesimentu bolsa estudu iha futuru”.
“Estadu Unidu sai ona Timor-Leste nia parseiru ba tempu naruk ne’ebé fornese bolsa estudu ba timoroan eselente sira hodi hetan oportunidade estuda no tuir programa interkámbiu iha Amérika. Ami-nia kompromisu mak atu haburas parseria ida ne’e. Ami kontinua ho esperansa katak ho kooperasaun bilaterál tulun hodi promove Timor-Leste nia Planu Dezenvolvimentu Estratéjiku Nasionál iha tinan hirak oin mai”, Tim Johnson hatete iha serimónia asina akordu ne’ebé hala’o iha salaun FDCH, sesta ne’e.
Nia lembra katak akordu ida ne’e halo bazeia ba memorandu entendimentu hodi hametin kooperasaun iha área interkámbiu ba edukasaun iha Ensinu Superiór ne’ebé asina ona iha dezembru 2022 entre Embaixada Amérika no Ministériu Ensinu Superiór, Siénsia no Kultura. Orsamentu ba bolsa estudu refere sei jere husi Institute of International Education nu’udar organizasaun globál ida ne’ebé la’ós atu buka lukru.
Institutu ne’e sei hala’o nia serbisu atu fasilita programa interkámbiu, inklui Fulbright Foreign Student Program. Programa ne’e fó dalan ba graduandu sira husi rai seluk no foinsa’e profisionál sira atu hala’o estudu no peskiza iha Estadu Unidu.
EUA anunsia katak sei habelar atribuisaun bolsa estudu ba Timor-Leste, inklui fó fatin adisionál sia ba estudante sira hodi hala’o edukasaun no peskiza iha rai refere no EUA nia estudante no bolseiru sira mai hanorin no hala’o peskiza iha Timor-Leste.
Iha tinan 20 ikus ne’e, Estadu Unidu fó ona dalan ba timoroan hamutuk 600-resin hodi eskola no tuir programa interkámbiu sira, liuhosi bolsa estudu USTL, Fulbright no Young Southeast Asian Leaders Iniviative (YSEALI).
Diretór-Ezekutivu FDCH, Cristovão dos Reis, reforsa katak akordu entre EUA no Governu timorense, liuhosi FDCH ne’e inísiu ida no sei iha hela prosesu nia laran. “Signifika foin loke oportunidade ba rekrutamentu depois sei halo tan selesaun ba dokumentu sira. Kuandu loos hotu ona maka foin determina sé mak atu bá, maibé seidauk hatene ema na’in hira maka mai kompete iha vaga ne’e. Agora kona-ba fundu ne’e FDCH no EUA iha hotu responsabilidade”, katak.
Ba bolsa ne’e, FDCH prevee ona rihun $150 no sei hetan mós apoui fundu hosi EUA, ne’ebé nia montante seidauk identifika.
Xefe Asuntu Públiku Embaixada Amérika, Tim Johnson, hatete katak kona-ba totál orsamentu hira maka Estadu Unidu sei prevee ba programa bolsa refere ba timoroan sira ne’e seidauk bele fó sai tanba depende ba universidade no sei inklui bolseiru na’in hira maka sei tama iha programa ne’e.
“Importante mak programa bolsa estudu ba timoroan sira ne’e tenke realiza no kontinua aumenta nafatin ninia númeru”, realsa.
Jornalista: Tomé Amado
Editora: Maria Auxiliadora
