LIQUIÇA, 05 maiu 2023 (TATOLI)—Kordenador Centros de Aprendizagem e Formação Escolar (CAFE) Liquiça, Teresa Costa hateten ezistensía eskola CAFE desenvolve tebes lian portuges iha Timor-Leste.
“Iha ne’e iha desenvolvimentu signifikativu ba lian portuges husi estudante sira. Bainhira iha inisiu tinan eskola hasoru difikuldade tanba iha uma estudante sira la kolia portuges maibé hafoin iha tinan daruak liu husi kontaktu loron-loron ho portuges bele hafasil liu tan,” Teresa Costa dehan ba Tatoli iha CAFÉ Liquiça, sexta ne’e.
Teresa Costa esplika, portuges hanesan baze no lian ofisíal ne’ebé institui ona hanesan lian ensinu nian no CAFE rasik disiplina hotu hanorin iha lian portuges, no ida ne’e aprende hotu iha eskola CAFE iha munisípiu hotu.
Hodi komemora loron mundial lian portuges ne’ebé selabra iha loron 05 maiu kada tinan, Escola CAFÉ Liquiça iha Pre-Eskolar mos halo expozisaun ba material resiklajen ne’ebé halibur husi estudante sira liu husi apoiu inan aman nian.
“Sira uza suratahan/dos no akua matan hodi pinta bandeira husi nasaun CPLP idak-idak liu husi apoiu inan aman nian, nune’e sira bele hatene nasaun saida deit mak koalia lian portuges,” nia hateten.
Eskola Liquiça dadaun ne’e iha estudante kuaze 800 ne’ebé tur iha banku Pré-eskolár to’o ensinu sekundariu. CAFE ninia objetivu mak atu fó kualifikasaun ba sistema edukativu ensinu timoroan nian, iha lian portugés.
CAFE oferta sistem edukativa, tuir kurríkulu no programa Timor nian ba alunu sira husi Munisípiu 12 Timor-Leste nian inklui iha Rejiaun Administrativa Espesiál Oekusi Ambenu (RAEOA).
Jornalista : Cidalia Fátima
Editora : Armandina Moniz
