DILI, 08 maiu 2023 (TATOLI)—Ministériu Agrikultura no Peska (MAP) liuhosi Diresaun Nasionál Irrigasaun finaliza ona dokumentu ba projetu harii irrigasaun boot iha munisípiu tolu.
“Dokumentu ba projetu tolu ne’e hetan ona aprovasaun hosi Ajénsia Dezenvolvimentu Nasionál (ADN) maibé agora mandatu VIII Governu nian atu ramata, ita hein governasaun foun mai mak kontinua tanba dokumentu sira ne’e kompletu ona hein de’it tau orsamentu ba konkursu públiku nian,” Diretór Nasionál Irrigasaun, Martinho Laurentino Soares, hateten ba Agência Tatoli, iha ninia knaar fatin, MAP, Comoro, segunda ne’e.
Notísia relevante : MAP fahe fini batar no hare kulit 300 tonelada iha tinan 2022
MAP planu harii irrigasaun iha mota Irabere postu administraivu Iliomar, munisípiu Lautém ne’ebé sei kobre natar Irabere no Uatucarbau, Baucau Seisal kobre ba natar Laga no Bobonaro mota Maliana kobre natar Maliana II.
Diretór dehan, dokumentu sira kompletu ona, nune’e Governu foun mai bele kontinua de’it no lori ba Sekretariadu Grande Projetu, tau osan no haruka dokumentu sira ba Komisaun Nasionál Aprovizionamentu (CNA, sigla portugés) hodi halo konkursu públiku.
“Kona-ba montante orsamentu ita seidauk hatene loloos maibé ba projetu boot sira hanesan ne’e, baibain to’o millaun ba leten,” nia akresenta.
Tuir Diretór, MAP iha esforsu no planu hakarak hadi’a no harii irrigasaun sira ho objetivu atu hasa’e produsaun hare iha rai-laran maibé presiza orsamentu hodi bele realiza planu sira.
“Ita hein maski neineik, maibé Governu sei hadi’a tanba planu prioridade hakarak hasa’e produsaun hare iha rai-laran,” nia tenik.
Jornalista : Arminda Fonseca
Editora : Julia Chatarina
