AINARO, 09 Maiu 2023 (TATOLI) – Sentru Saúde Ainaro Vila sei menus rekursu umanu hodi halo atendimentu médiku ba komunidade sira iha postu administrativu Ainaro Vila, munisípiu Ainaro.
“Ita iha médiku nain-8 de’it ne’ebé koloka ba iha suku Kassa, Soro, Soru Kraik, Manutasi ho Nugufu, enkuantu iha suku Maulu ho Maununu seidauk iha médiku ruma. Iha Unidade Internamentu mós iha nain-3 de’it. Portantu atu reforsa servisu internamentu nian, ami dada fali médiku sira ne’ebé koloka iha suku Soro, Soru Kraik ho Manutasi”, Xefe Sentru Saúde Ainaro Vila, Arquimenio Orleans de Araujo, informa ba Tatoli, tersa ne’e.
Tuir dirijente, Sentru Saúde Ainaro tenki iha pelu menus médiku nain-16 hodi bele destaka ba iha suku hitu ne’ebé pertense ba postu administrativu Ainaro Vila no nain-5 fó apoiu ba iha internamentu nian, atu nune’e bele garante nain-4 halo atendimentu no nain-1 fó konsulta jerál.
“Agora ami-nia rekursu sei menus los, iha internamentu ne’e tenki iha médiku nain-5 hodi asegura atendimentu ba pasiente sira durante 24 oras”, nia realsa.
Arquimenio de Araujo preokupa mós ho limitasaun pesoál médiku iha munisípiu, tanba dalaruma profisionál saúde sira ne’e balun ba tuir tiha konkursu públiku iha Díli, liuliu iha Hospital Nasionál Guido Valares, nune’e afeta ba redusaun rekursu umanu ne’ebé apoiu iha munisipál.
Notísia relevante: Saúde- Lautém menus fasilidade no rekursu umanu
Jornalista: Afonso do Rosário
Editora: Isaura Lemos de Deus
