LIQUIÇA, 11 maiu 2023 (TATOLI)– Partidu Kmanek Haburas Unidade Nasional Timor Oan (KHUNTO) liu husi kampaña eleitoral ne’ebé hala’o iha Munisípiu Liquiça deklara agora la’os oma tempu atu povu kontinua hela iha uma duut.
“Partidu KHUNTO hakarak sidadaun ida labele hela iha uma duut. Uma duut so bele ba deit uma lisan. Iha oitavu governu ita halo ona uma dignu liu husi Uma Naroman ba Povu,” Prezidente Partidu KHUNTO, Armanda Berta dehan liu husi nia intervensaun iha Kampaña Eleitoral, Munisípiu Liquiça, kinta semana ne’e.
Armanda Berta rekoñese durante nia mandatu hanesan membru governu ida lao haleu ona Timor laran no kontinua hare’e povu balun sei hela iha uma ne’ebé la dignu, nune’e Partidu KHUNTO hakarak dala ida tan hetan oportunidade hadia povu nia moris.
Nia deklara, Partidu KHUNTO lakohi atu halo promesa ba povu tanba ne’e hanesan naha todan ida maibé bainhira povu fo fiar ba KHUNTO sei esforsu aan hodi bele lori povu sai hosi mukit laran.
“La promete ba ita boot sira husi inisiu tanba se manan tiha mak la halo ne’e hanesan naha todan. Ha’u la preokupa ho ema kolia ha’u maibe nu’udar Prezidenti Partidu preokupa mak povu sira ne’ebé sei moris iha fatin ne’ebé la dignu,” Armanda Berta afirma.
Partidu KHUNTO rasik prepara ona nia planu sira iha livru planu ne’ebé foku ba setór sira hanesan edukasaun, saude, infraestutura, turizmu, defeza, seguransa nasional, infraestutura báziku no seluk tan.
Armanda Berta husu ba militante no votante sira atu fo fiar ba Partidu KHUNTO liu husi hili ba numeru 5 iha loron 21 maiu 2023.
Kampaña Eleitoral husi Partidu KHUNTO ne’e rasik hahu iha tuku 02:00 lorokraik no hetan seguransa husi PNTL inklui missaun observasaun hanesan CNE, RENETIL, PDHJ no seluk tan.
Jornalista : Cidalia Fátima
Editora : Armandina Moniz
