DILI, 15 maiu 2023 (TATOLI)–Empreza Heineken Timor-Leste, segunda ne’e, introdús tan dezeñu foun ba embalajen (lata) bintang no fa’an ona iha merkadu nasionál.
“Ita lansa embalajen ho dezeñu foun. Ami rona konsumidór sira-nia hanoin no sujestaun bainhira ami halo peskiza iha merkadu iha joven barak hakarak serveja bintang ne’e iha buat ruma ne’ebé moris, hodi fó ninia inovasaun di’ak liu, ho ida-ne’e ami rona sira no mai ho dezeñu foun ne’ebé bele atrai konsumidór sira tanba bazeia ba sira-nia sujestaun katak ita mai ho lata foun ne’ebé atrativu liu,” Diretór Ezekutivu Empreza Heineken, Prasantha Manjuka, hateten iha iha salaun Heineken, Timor Plaza CBD3.
Nia dehan, serveja bintang hanesan serveja favóritu iha Timor-Leste no konsumidór barak mak hakarak bebida ne’e mai ho aparénsia modernu liu.
“Entaun Heineken kria tan lata foun ho modernu, nia fitun ida boot tebes iha embalejen nia isin lolon. Espera ida-ne’e bele hatan ona ba konsumidór sira-nia hakarak maski serveja ne’e ho nia lata foun, maibé ninia sabór ne’e hanesan de’it, diferente de’it iha lata. Ohin ita lansa, hahú ohin ita-nia serveja ne’e fa’an ona iha merkadu sira,” nia akresenta.
Notísia relevante : PR Horta sujere Governu proteje investimentu hosi Heineken
Iha fatin hanesan, Diretór Ezekutivu marka Bintang, Tiago Graça, relata, dezeñu foun iha isin lolon ne’e fitun boot kompara antes fitun kiik.
Diretora Relasaun Públika Heineken, Filomena Filipe, sente orgullu no previléjiu tebes tanba marka bintang bele fornese iha Timor-Leste.
“Ezisténsia Heineken iha Timor-Leste bele suporta atividade barak liuhosi parte responsabilidade sosiál hanesan kuda ai-parapa, hamoos tasi, kuda ai-oan iha foho loloon no suporta mós ba empoderamentu feto. Ho bintang nia prezensa embalajen foun ida-ne’e bele hamosu tan kreatividade no inovasaun foun iha futuru mai,” nia tenik.
Iha biban ne’e, Heineken Timor-Leste agradese ba Governu nia suporta másimu ba empreza hodi kontinua eziste.
Jerente Heineken iha tinan 2020 koko ko’alia ho Governu kona-ba posibilidade hasa’e taxa importasaun serveja ho alkoólika a’as.
“Entaun momentu ne’ebá Governu tau atensaun ba asuntu ne’e no introdús taxa ba alkoólika a’as ho presu a’as, ida-ne’e fó oportunidade di’ak ba Heineken hanesan empreza ne’ebé halo produsaun serveja iha rai-laran ho kualidade internasionál,” Diretora haktuir.
Jornalista : Arminda Fonseca
Editora : Julia Chatarina
