DILI, 16 maiu 2023 (TATOLI)— Prezidente Autoridade munisípiu Ermera no Administradór munisípiu Ainaro husu ba sidadaun sira atu vota tuir konsiénsia tanba vota ne’e sekretu.
“Lakleur tan ita ba ona eleisaun jerál hodi eleje ita-nia IX Governu no ita-nia kinta Lejizlatura. Ha’u espera katak ita-nia povu ne’e konsiénte no konvensidu, nune’e sei ezerse direitu livre no sekretu ba Governu ida ne’ebé di’ak tuir idaidak nia hanoin no perspetiva,” Prezidente Autoridade Ermera, Eusébio Salsinha, hateten iha ámbitu lansamentu fatuk dahuluk ba projetu reabilitasaun estrada Letefoho bá Hatubuilico, tersa ne’e.
Biban hanesan, Administradór munisípiu Ainaro, Leovigildo Amaral Pereira, hateten loron Eleisaun Parlamentár besik ona, tanba ne’e husu atu hotu-hotu hakbesik ba sentru votasaun sira hodi vota.
“Ita hotu tenke bá vota, sé mak la vota ema riska iha livru naran, tanba ne’e maka hetan imi-nia naran riska iha livru ne’e karik lalika protesta barak, ne’ebé bainhira Governu ida mai ukun ita-boot sira labele halo reklamasaun kona-ba ita-boot sira-nia direitu, ne’ebé husu atu hotu-hotu vota tuir konsiénsia, ida-ne’e maka ita-nia demokrasia,” Autoridade Ainaro tenik.
Notísia relevante : Eleitór 99.158 hosi Baucau elijível vota iha eleisaun parlamentár
Sekretariadu Tékniku Administrasaun Eleitorál (STAE) rejista eleitór hamutuk 890.145, kompostu hosi eleitór rai-laran hamutuk 878.345 no diaspora 11.800. Eleitór elejível hamutuk 890.145, kompostu hosi mane 462.316 no feto 427.829.
Nune’e, eleitór hosi munisípiu Aileu hamutuk 34.962, Ainaro 47.912, Ataúro 7.598, Baucau 99.158, Bobonaro 72.537, Covalima 49.299, Dili 187.462, Ermera 85.358, Lautém 49.435, Liquiça 53.084, Manatuto 36.547, Manufahi 42.136, Viqueque 58.566 no Rejiaun Administrativa Espesiál Oé-cusse Ambeno (RAEOA) 54.291.
Eleitór estranjeiru 11.800 kompostu hosi Austrália hamutuk 2.242, Koreia Súl 1.597, Irlándia 2.415, Portugal 1.836 no Inglatera 3.710.
STAE rejista ona sentru votasaun iha nasionál no diáspora hamutuk 1.472 no sentru estasaun votu 1.850.
Antes ne’e, iha Eleisaun Prezidensiál 2022 STAE rejista eleitór hamutuk 864.754 ka 2,9% menus hosi eleitór iha Eleisaun Parlamentár 2023.
Jornalista : Antónia Gusmão
Editora : Julia Chatarina
