HEADLINE, LIQUIÇÁ

JPIC–OIPAS : Parpol balun kontinua lori simpatizante husi munisípiu seluk

JPIC–OIPAS : Parpol balun kontinua lori simpatizante husi munisípiu seluk

Kordenador JPIC – OIPAS Munisípiu Liquiça, Joanico Alves Freitas. Imajen Tatoli

LIQUIÇA, 16 maiu 2023 (TATOLI)— Misaun Observador Justiça e Paz e Integridade da Criação – Observador da Igreja Para os Assuntos Sociais (JPIC – OIPAS) nota katak Partidu politiku (Parpol) balun kontinua lori simpatizante husi munisípiu seluk durante hala’o kampaña eleitoral.

Kordenador JPIC – OIPAS Munisípiu Liquiça, Joanico Alves Freitas rekoñese ema hotu ho idade hanesan eleitor ida iha direitu hodi tuir kampaña eleitoral hodi rona rasik saida mak Parpol sira hato’o konaba sira nia programa, maibé la presiza lalin simpatizante husi munisípiu seluk.

“Ema hotu iha direitu atu tuir kampaña hanesan defisiente sira, inan aman no seluk tan, maibe ladun diak mak lori ema husi fatin dook hanesan Dili ka fatin seluk. Ami hare’e husi partidu balun lori husi munisipiu seluk,” Joanico Alves dehan ba Tatoli iha STAE Munisípiu Liquiça, tersa ne’e.

Nia esplika, hanesan observador husi JPIC – OIPAS ne’ebé halo ona observasaun ba kampaña eleitoral oin-oin bele hatene hirak ne’ebé mak ema foun ou lae iha munisípiu ida, liu-liu ba Liquiça ne’ebé mai deit husi Postu Administrativu tolu (3).

“Ita hatene Liquiça ne’e hatene malu hela no bele nota ema foun mak barak,” nia hateten.

Joanico Alves Freitas afirma Parpol sira barak mai ho modelu kampaña oin-oin hanesan konta istoria, hatuun malu, lalin deit simpatizante sira hodi halo pawai inklui involve labarik ka adolesente sira ne’ebé seidauk iha direitu ba vota.

Parpol balun mos ladun disipliña ba orariu no fatin ne’ebé fo sai ona husi CNE no muda tuir hakarak sem konfirmasaun CNE, maibé hirak ne’ebé halo komisiu kontinua mantein sira nia orariu.

Partidu hirak ne’ebé realiza ona nia kampaña eleitoral ho tipu komisiu iha mak hanesan Frente Revolucionária de Timor-Leste Independente (FRETILIN – 11), Partido os Verdes de Timor (PVT – 6), Partido da Libertação Popular (PLP – 3), Partido Democrático (PD – 4).

Partidu Kmanek Haburas Unidade Nacional Timor Oan (KHUNTO – 5), Partido da Unidade de Desenvolvimento Democrático (PUDD – 8) no Partidu Congresso Nacional de Reconstrução de Timor-Leste (CNRT – 12). 

Jornalista : Cidalia Fátima

Editora     : Armandina Moniz

iklan
iklan

Leave a Reply

iklan
error: Content is protected !!