DILI, 17 maiu 2023 (TATOLI) – Sekretáriu-Jerál Partidu Kongresu Nasionál Rekonstrusaun Timor-Leste (CNRT), Francisco Kalbuadi Lay, husu ba militante, simpatizante no movimentu sira ne’ebé apoiu CNRT tenke respeita adveráriu no hatudu dixiplina iha kampaña ikus CNRT nian ne’ebé sei realiza iha loron 18 maiu.
“Aban loron ikus mai ita atu enserra ita-nia kampaña iha Dili, Tasi Tolu. Ha’u apela ba joven sira, liuliu sira ne’ebé sa’e motór atu dixiplina no respeita nafatin regra tránzitu, uza kapasete, la bele uza kanu-resin, monta asesóriu motorizada ho kompletu atu labele prejudika imi-nia aan iha eventu ne’e”, Kalbuadi Lay apela liuhosi konferénsia imprensa iha Bairro dos Grilho, kuarta ne’e.
Nia husu ba ema hotu ne’ebé apoia CNRT atu la’o tuir orden no hatudu katak Partidu CNRT nia emar sira iha duni dixiplina, nune’e bele husik hela imajen ba públiku katak militante sira iha maturidade polítika.
“Ha’u apela mós ba militante no simpatizante atu labele halo provokasaun, maibé buka mós atu hadook-aan hosi ida ne’e. Ho de’it ne’e maka ita-nia kampaña ne’e bele termina ho susesu”, salienta.
Kalbuady Lay realsa katak povu sei ezerse sira-nia direitu kada tinan lima no buat ne’ebé povu deside sé maka atu bá kaer ukun, ema hotu tenke respeita.
“Ne’e duni hadomi malu ba nu’udar timoroan ida de’it, família ida de’it no rai ida de’it. Tanba ne’e aban kampaña Partidu CNRT nian sei hahú iha 12h00 bazeia ba númeru sorteiu 12 ne’ebé monu ba CNRT. Se de’it maka hakarak partisipa, mai bá ita hamutuk iha filleira ida hodi lori partidu fila bá kaer ukun atu hadi’a rai doben ida ne’e”, nia afirma.
Rekorde katak abertura kampaña CNRT realiza, iha 19 abríl, iha Manatuto no termina aban iha Dili.
Jornalista: Tomé Amado
Editora: Maria Auxiliadora
