Boxe TL hetan medalla rua iha Sea Games
DILI, 18 maiu 2023 (TATOLI) – Boxe Timor-Leste (TL) hetan medalla osan metan rua iha eventu internasionál Sea Games 2023.
“Hanesan timoroan sente orgullu tanba ita konsege konkista vitória hodi hetan medalla osan metan rua, lolos ita hetan medalla osan mean la’os osan metan, tanba jogu ne’e lao bainhira atleta Delio hasoru atleta Vietname Delio halo jogu di’ak tebes, iha ronde primeiru konsege tuku atleta Vietnam ne’e nia oin laran maibé la fó pontu ba Delio fó fali ba Vietnam ne’e”, Treinadór Selesaun Nasionál Federasaun Boxe Amadora Timor-Leste (FBATL) Abilio Orlando dos Santos ba Agência TATOLI iha Dili, ohin.
Nia deskonfia mosu ona mafia iha eventu Sea Games ne’ebé impede vitória ba Boxista Timor-Leste nian labele hakat ba oin.
“Maibé laiha buat ida, ita nafatin simu realidade ida ne’e, hanesan treinadór ho idade joven la lakon esperansa hodi prepara nafatin atleta sira ba eventu sira tuir mai”, nia adianta.
Atleta na’in rua ne’ebé konsege oferese medalla ba Timor-Leste mak Delio Mouzinho no Edigar Quintão. Boxista na’in rua ne’e hetan medalla tanba okupa iha terseiru lugar.
Atleta hirak ne’e hamutuk ho treinadór prepara-aan tan ba eventu Asian Games ne’ebé sei halao iha nasaun Xina iha tinan ida ne’e.
Notísia relevante : Boxista Delio prepara ba semi finál hafoin fó KO ba Boxista Singapura iha SEA Games
Jornalista: Hortencio Sanez
Editór : Zezito Silva
