Durante kampaña eleitorál, CNE Manatuto rejista krime rua
MANATUTO, 18 maiu 2023 (TATOLI)—Diretór Komisaun Nasionál Eleisaun (CNE), munisípiu Manatuto, Paulino Soares, hateten durante kampaña eleitorál la’ o fulan ida iha Manatuto, CNE rejistu krime rua.
Notísia Relevante: CNE Manatuto identifika profesór-pesoál saúde partisipa kampaña FRETILIN
“Ligadu ho krime, ami rejista krime rua, ida mak iha postu Laclo militante tuda malu, ne’e ami rejista administrativamente iha munisípiu ona. Ida seluk mak iha loron 30 abríl 2023, partidu FRETILIN obriga hatuun bandeira CNRT hodi selu osan $200. Maibé to’o ikus ema-ne’ebé simu osan ne’e reklama fali no informa, nune’e ami fasilita hodi keixa informasaun sira-ne’e. No, oras daudaun prosesu iha iha Tribunál Baucau nian,” nia hateten ba Agência Tatoli, liuhoisi telefónika, kinta ne’e.
Paulino Soares dehan, akontesimentu obriga hatuun bandeira CNRT ne’e iha suku Umakaduak, postu administrativu Laclo, munisípiu Manatuto.
“Ita ajusta ba relatóriu no hein de’it tanba prosesu hotu-hotu iha Tribunál Baucau,” nia dehan.
Kona-ba funsionáriu no envolvimentu labarik iha kampaña, nia dehan, partidu hotu-hotu iha funsionáriu no mós labarik.
“Durante fulan ida ami superviziona kampaña eleitorál hosi partidu polítika hotu-hotu iha munisípiu Manatuto, funsionáriu maiória mak tuir kampaña, tantu iha komísiu no tipu door-to-door iha postu to’o suku sira. Labarik barak mak involve iha laran. Maibé ida-ne’e dala barak múzika mak bolu labarik sira. Ida-ne’e laiha problema,” nia hateten.
Kona-ba viatura Estadu, nia dehan, partidu KHUNTO ho FRETILIN mak uza patrimóniu Estadu bainhira partisipa iha kampaña eleitorál ne’ebé realiza iha Manatuto.
“Ida-ne’e ami ajusta ona tanba laiha dalan hodi partidu polítika sira uza patrimóniu Estadu hodi partisipa iha kampaña. Iha mós motór Estadu maibé sira uza iha door-to-door nian iha suku,” nia dehan.
Kona-ba asidente, nia hateten, militante Partidu Libertasaun Popular (PLP) nia karreta mak xoke malu ho karreta Carry ida iha Laclubar.
Notísia Relevante: CNE Manatuto identifika militante FRETILIN konsumu alkol iha tempu kampaña
Jornalista : Osória Marques
Editór : Cancio Ximenes
