F-FDTL-PNTL louva maturidade povu Timor-Leste iha Eleisaun Parlamentár

DILI, 24 maiu 2023 (TATOLI) – Komandu FALINTIL-Forsa Defeza Timor-Leste (F-FDTL) ho Polísia Nasional Timor-Leste (PNTL), louva timoroan tomak nia maturidade tanba kontribui ona ba estabilidade nasionál durante Eleisaun Parlamentár iha Timor-Leste.
“Insituisaun F-FDTL ho PNTL, hatudu rezultadu pozitivu di’ak, durante fó seguransa, hahú iha kampaña no Eleisaun Parlamentár iha situasaun jerál la’o di’ak. Tanba ne’e komandu F-FDTL ho PNTL kongratula ba membru tomak ne’ebé halo misaun iha terenu ho esforsu no sakrifísiu, empeñamentu ho dedikasaun tomak sira hatudu iha nivél nasionál to’o iha munisipiu. Ida ne’e mak povu presiza duni atu garante pás ho estabilidade iha Timor-Leste”, Xefe Estadu Maiór Jenerál F-FDTL, Tenente Jenerál Falur Rate Laek hateten ba jornalista sira, hafoin partisipa iha serimónia abertura ba apuramentu nasionál iha salaun CNE, Colmera, kuarta ne’e.
Nia dehan, membru F-FDTL ho PNTL ne’ebé koloka hodi apoiu ba seguransa iha munisípiu sanulu resin tolu ho RAEOA, kontinua mantein seguransa iha baze, depois hein Tribunál fó sai rezultadu eleisaun parlamentár.
“Ha’u-nia membru sira ha’u fó ona orientasaun, depois 48 oras hein anúnsiu rezultadu ofisiál ona iha Tribunál mak ha’u foti desizaun, maibé depende ba evolusaun, bainhira situasaun kalma ami prontu atu retira membru sira iha baze”, Falur afirma.
Tenente Jenerál F-FDTL ne’e hateten, insidente kiik sira neebé akontese iha Munisípiu Viqueque insituisaun PNTL ho F-FDTL koopera malu hodi atua, depois komunidade sira rasik kontente no gosta servisu ida ne’e.
“Iha Munisipiu Viqueque ne’e ha’u koalia bebeik ida ne’e hanesan teste iha ba ami instituisaun defeza no seguransa ida ne’e hanesan moras ida, kada tinan iha Viqueque akontese, maibé la signifika altera situasaun hotu iha Timor-Leste”, nia tenik.
Iha fatin hanesan, Komandante Jerál PNTL, Komisáriu Jerál Polísia, Henrique da Costa hateten, Eleisaun Parlamentár iha tinan 2023, situasaun seguransala’o ho diak, tanba povu no komunidade tomak iha Timor-Leste hatene ona atu dezenvolve nasaun ne’e tenke kria estabilidade ho pás.
“Ha’u mak koalia dala ruma povu la fi’ar, maibé ita hotu akompaña situasaun jerál iha Timor-Leste, buat hotu la’o kontroladu, hahú hosi kampaña eleitorál to’o elisaun parlamentar buat hotu lao di’ak”, nia dehan.
Situasaun Jerál iha Timor-Leste la’o di’ak, ne’e tanba povu no komunidade rasik hatene ona katak atu dezenvolve nasaun ne’e ba oin, presiza kria estabilidade atu sidadaun hotu bele ba ezerse sira nia direitu votu tuir sira-nia hakarak.
“Iha munisípiu balun mak membru sira ita retira ona, maibé iha Munisípiu Viqueque membru sira kontinua mantein seguransa, tanba ne’e komandu sei haree atu aumenta membru PNTL ba iha Munisipiu Viqueque hodi halo medidas prevensaun ba konflitu ki’ik sira ne’ebé mak kontinua akontese”, Komisáriu Jeral Polísia, Henrique da Costa haktuir.
Jornalista: Natalino Costa
Editór : Zezito Silva

