DILI, 26 maiu 2023 (TATOLI)–Prezidente Tribunál Rekursu, Deolindo dos Santos, sesta ne’e, relata progresu serbisu Tribunál ba Primeiru-Ministru, Taur Matan Ruak, liu-liu progresu implementasaun projetu konstrusaun edifísiu Tribunál Distritál Dili (TDD) ne’ebé ninia progresu fíziku foin atinje 62%.
“Asuntu ne’ebé ha’u hato’o ba Primeiru-Ministru konsentra liubá obra ne’ebé la’o hela iha Caicoli tanba loron hira tan adidu ba obra ne’e sei termina, katak iha loron 30 maiu tinan ne’e termina maibé obra ne’e rasik seidauk hotu, halo nusa mak obra ne’e atu kontinua nafatin ne’ebé ha’u mai dehan ba Primeiru-Ministru katak obra ne’e sei labele ramata iha mandatu Governu ida agora nian maibé ha’u sei kontinua nafatin obra ne’e ho Governu tuir-mai hodi finaliza obra refere,” Prezidente Tribunál Rekursu hateten iha Palásiu Governu.
Nia dehan, presiza tan tempu fulan-lima hodi finaliza obra ne’e, maibé ezekusaun ein termu pagamentu la’o di’ak tanba hetan apoiu hosi Governu.
“Orsamentu ne’ebé prevee sufisiente atu halo pagamentu maibé nia ezekusaun fíziku maka tarde tanba materiál sira ne’ebé presiza dala-ruma tarde no fiskalizasaun ne’ebé ekipa fiskalizadór sira halo rigór tebes. Ekipa sira ne’e inklui mós ekipa fiskalizasaun hosi Unidade Jestaun Projetu ne’ebé ha’u rasik forma hodi kontrola di’ak ba obra ne’e,” nia akresenta.
Notísia relevante : Konstrusaun edifísiu Tribunál Distritál Dili sei konklui iha maiu
Prezidente TR rasik mak forma ekipa fiskalizasaun hodi evita má jestaun ba projetu atu evita pagamentu sira ne’ebé akontese.
“Signifika bainhira halo pagamentu sira ba buat ne’ebé la halo no to’o buat balun ne’ebé la presiza halo maibé obriga halo entaun tenke haree didi’ak. Ha’u fiar metin katak maski Primeiru-Ministru nia mandatu ramata, maibé Governu ida ne’ebé mai sei kontinua nafatin tanba obra ida-ne’e tanba ninia valór boot tebes no presiza halo ho di’ak hodi termina ho di’ak tanba obra ida ne’e nia importánsia ba rai ida-ne’e boot tebes tanba bainhira ita ko’alia kona-ba Tribunál Distritál Dili no Tribunál Primeira Instánsia Dili ninia númeru prosesu ne’e boot tebes, entaun nia akumula maioria númeru prosesu iha Primeiru Instánsia. Tanba ne’e nia kondisaun ne’e presiza kria di’ak liután,” nia tenik.
Empreza responsável projetu simu ona pagamentu millaun $5 hosi orsamentu ne’ebé prevee millaun $10 resin.
“Hosi progresu ne’e liu ona maibé pagamentu seidauk la’o. Normalmente ezekusaun ba obra sira ne’e sempre iha adisionál maibe atu dehan orsamentu adisionál ba projetu ne’e laiha, no posibilidade atu poupa tan Estadu nia osan mak iha, ne’ebé osan millaun $10 ne’e bele halo poupansa,” nia tenik.
Konstrusaun ba edifísiu foun TDD ne’e lansa fatuk dahuluk iha loron 25 novembru 2020, ne’ebé hetan supervizaun hosi konsultóriu empreza Dacrea In Association with AEC no kontratór hosi empreza Xina Shadong International Economic and Technical Cooperation Group.R.P. ho valór projetu $10.990.769,35.
Jornalista : Antónia Gusmão
Editora : Julia Chatarina
