PDHJ louva serbisu PNTL Bobonaro durante kampaña eleitorál
MALIANA, 30 maiu 2023 (TATOLI) – Diretór Provedoria Direitu Humanu no Justisa (PDHJ), Delegasaun Territoriál Maliana, Domingos Pinto Tavares, louva serbisu Polísia Nasionál Timor-Leste (PNTL) tanba konsege asegura situasaun seguransa la’o ho kontrola durante kampaña eleitorál eleisaun parlamentár la’o ho susesu.
Domingos Pinto Tavares, haktuir PDHJ hahú nia atividade fiskalizasaun no monitorizasaun durante kampaña eleitorál situasaun seguransa iha munisípiu Bobonaro la’o ho kontroladu.
Notísia relevante: PNTL Bobonaro sei asegura materiál eleisaun nu’udar entidade alta
“Ami hato’o kongratulasaun ba PNTL munisípiui Bobonaro liuhosi ita-nia Komandante Antoninho Mauluta, tanba bele organiza ninia element sira halo serbisu iha terrenu ho di’ak no organizadu tebes ke ita bele dehan kuaze partidu hira nia mobilizasaun masa ne’e boot tebes mai Maliana,maibé laiha problema to’o remata,” nia informa ba jornalista sira iha Maliana, tersa ne’e.
PDHJ mós louva maturidade polítika hosi polítiku lideransa partidu polítiku tanba atividade kampañia eleitorál iha munisípiu Bobonaro la’o kontrolada.
“Sira organiza sira-nia membru hodi partisipa kampaña partidu sira-nia ho di’ak tebes, la provoka malu,ein-jerál ami mós hakarak kongratula ba povu munisípiu ne’ebé fó kontribuisaun ba establidade,” nia dehan.
Enkuantu durante prosesu eleisaun parlamentár, PDHJ identifika funsionariu públiku hamutuk na’in neen mak partisipa kampana eleitorál Partidu Kongresu Nasionál Rekonstrusaun Timorense (CNRT), iha loron kinta loron (11/05) no na’in ida partisipa kampaña Partidu Os Verdes de Timor (PVT).
Funsionariu hirak ne’e na’in neen hosi Servisu Edukasaun Munisipál Bobonaro barak liu profesor no na’in ida ne’ebé partisipa iha kampaña PVT mai hosi Dili.
“Hosi sira ne’ebé ita identifika, ita haruka ona ninia relatoriu ida lalais ne’e ba diresaun nasionál fiskalizasaun atubele dezenvolve relatoriu final hodi nune’e provedór bele relata ba Ministériu Públiku,” nia katak.
Nia dehan, funsionariu hirak ne’e kontra lei Komisaun Funsaun Públika, lei númeru 8/2004 ne’ebé altera ba Lei númeru 5/2009 katak funsionariu públiku bandu partisipa kampaña eleitorál iha loron serbisu hosi segunda to’o sesta, hahú oras tuku 08:00 to’o tuku 17:00 lokraik.
Nune’e mos identifika mos patrimoniu estadu, motorizada tolu ne’ebé mai hosi Ministériu Administrasaun Estatál (MAE) ne’ebé utiliza hosi funsionariu administrasaun munisipál Bobonaro, funsionariu autoridade postu administrasaun Cailaco no xefe suku na’in ida.
Enkuantu motorizada unidade tolu ne’e daudaun ne’e sei asegura hela iha komandu Polísia Munisípiu Bobonaro hodi hein prosesu kontinuasaun hosi Ministériu Públiku.
“Ne’e iha parte krime nian, agora parte administrativa nian, PDHJ kontinua halo prosesu depois haruka ninia relatoriu ba instituisaun sira ne’ebé nia ema halo infrasaun ba abuju pder ne’ebé outiliza patrimoniu estadu ba tuir kampaña partidu polítiku,” nia dehan.
Notísia relevante: PNTL Bobonaro firme asegura kampaña eleitorál
Jornalista : Sergio da Cruz
Editór : Evaristo Soares Martins
