DILI, 31 maiu 2023 (TATOLI)–Diretór-Ezekutivu Pelican Paradise, Jeremiah Chan, informa, konstrusaun Dili sidade istórika tama ona faze dahuluk hanesan kee rai iha terrenu no halo estrada, dada bee no eletrisidade hafoin avansa ba harii otél tuir akordu investimentu ne’ebé halo ho Governu.
Pelican Paradise sei halo konstrusaun otél, apartamentu no rezidénsia hamutuk unidade 287 ho kustu millaun $100, ne’ebé iha faze dahuluk, empreza Malázia ne’e sei hahú projetu iha rai ektare 16, ne’ebé tuir planu sei finaliza iha tinan 2026.
“Iha ona empreza internasionál ida mak manán hodi ezekuta obra ne’e maibé faze analiza dokumentu sira seidauk ramata, kuandu ramata ona mak sei avansa ba asinatura kontratu ho empreza konsultór hodi avansa ona konstrusaun iha faze dahuluk ne’ebé prevee iha akordu investimentu,” Jeremiah Chan hateten ba Agência Tatoli iha ninia knaar fatin, iha Timor Plaza, kuarta ne’e.
Notísia relevante : Empreza tolu submete dokumentu ba konstrusaun Díli Sidade Istórika
Nia dehan, Pelican Paradise iha fulan-maiu ne’e hala’o reuniaun ho Governu liuhosi Ministériu Koordenadór Asuntu Ekonómiku, Ministériu Obra Públika, no Ministériu Saúde hodi ko’alia kona-ba asuntu balun, liu-liu kona-ba koordenasaun serbisu.
“Importante liu maka bee no ahi. Daudaun ami seidauk presiza bee no ahi tanba serbisu ne’ebé la’o hela ladun presiza bee no ahi. Maibé iha setembru tinan ne’e ami-nia ekipamentu pezadu hosi Singapura to’o mai Timor, ne’ebé bainhira ekipamentu sira ne’e to’o mai ami presiza Governu ninia apoia hodi fornese bee no enerjia eletrisidade nune’e ajuda empreza aselera konstrusaun,”nia akresenta.
Daudaun utiliza ekipamentu sira hodi kee rai iha terrenu ne’ebé lokaliza iha Tasi-tolu no empreza kontrata traballadór timor-oan no ekipamentu sira hosi empreza nasionál nian. Maibé ba oin sei uza tékniku no espesialista estranjeiru no empreza nian.
Iha sorin seluk, Ministru Prezidénsia Konsellu Ministru, Fidelis Manuel Leite Magalhães, relata, Governu simu informasaun ofisiál hosi empreza katak hahú ona faze lansamentu konkursu ba kontratór sira atu halo konstrusaun.
“Ida-ne’e tuir hela kalendáriu ne’ebé maka hatur iha akordu espesiál investimentu, ne’ebé la halai ses hosi akordu refere. Kuandu halo projetu sira iha opsaun rua, dahuluk sira lansa uluk ho ezekusaun maka haree liu de’it, opsaun seluk maka sira halo aranju sira haree didi’ak hotu problema no dezafiu sira no rezolve tiha para avansa hodi prodús fali tempu,” nia dehan.
Portavos Governu adianta, empreza privadu sira ne’ebé iha ona akordu ho Governu tenke kumpre tempu, hanesan mós parte Governu tenke kumpre akordu investimentu ne’e.
Pelican Paradise lansa konkursu públiku iha setembru 2022 no estende to’o 15 fevereiru 2023.
Tuir planu, empreza ne’e sei halo dezenvolvimentu turístiku ho totál investimentu millaun $700, ne’ebé área dezenvolvimentu turístiku ne’e tuir planu sei harii iha rai ektare 558, iha zona entre Tasi-tolu no Tibar, inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.
Dezenvolvimentu ne’e sei permite kriasaun postu traballu ba ema 1.500 iha faze konstrusaun no 1.300 traballu permanente.
Jornalista : Antónia Gusmão
Editora : Julia Chatarina
