iklan

EKONOMIA, HEADLINE

MTKI sensibiliza PENT ba funsionáriu sira

MTKI sensibiliza PENT ba funsionáriu sira

Vise-Ministra Turizmu Komunitária no Kulturál, Inâcia da Conceicão Teixeira. Imajen Tatoli/Francisco Sony

DILI, 31 maiu 2023 (TATOLI)Ministériu Turizmu Komériu no Indústria (MTKI) liuhosi Gabinete Diresaun Jerál Turizmu, kuarta ne’e, sensibiliza Planu Estratéjiku Nasionál Turizmu (PENT) 2023-2030 ba funsionáriu sira.

“PENT lansa ona iha loron 15 maiu 2023, ne’ebé sai mata dalan atu dezenvolve setór turizmu iha Timor tomak, entaun ohin ne’e ita kontinua sensibiliza ba ita-nia funsionáriu sira hosi Diresaun Jerál no Diresaun Nasionál MTKI hodi hatene planu no programa sira hodi implementa,” Vise-Ministra Turizmu Komunitáriu no Kulturál, Inâcia da Conceição Texeira, informa iha Sentru Konvensaun Dili (CCD, sigla portugés).

Governante ne’e dehan, Governu ho inisiativa elabora PENT tanba durante halo observsaun, nota katak Timor-Leste laiha vizaun klaru, tanba ne’e bainhira Governu troka laiha atinjimentu ruma.

“Maibé agora ho matan dalan PENT ida-ne’e, bainhira Governu troka mós sei ajuda servisu turizmu tanba iha ona programa no planu klaru atu dezenvolve turizmu tanba hetan ona aprovasaun hosi Konsellu Ministru,” nia akresenta.

Notísia relevante : Governu aprova Planu Estratéjiku Nasionál ba Dezenvolvimentu Turizmu

Vizaun PENT mak atu dezenvolve Timor-Leste hanesan destinu turístiku úniku ida iha Ázia.

“Ita-nia estratejia atu atinje PENT ne’e nia implementasaun hamutuk fatór estratéjiku 11, área protejidu 53, atividade prioridade 100 no implementasaun ida,” Vise-Ministra relata.

Iha fatin hanesan, Asesór Espesialista Turizmu Komunitáriu, Manuel Vong, konsidera PENT importante tanba turizmu iha nasaun ida atu la’o tenke iha planu di’ak atubele la’o tuir.

“Turizmu nu’udar xave ba dezenvolvimentu prosperidade no bein-estár nian, nune’e Timor-Leste tenke planeia didi’ak nia dezenvolvimentu turizmu hodi hetan nia asesibilidade no maturidade, nune’e mós mantein rendimentu no sustentabilidade,” nia deskreve.

Antigu Ministru Turizmu ne’e dehan, dezenvolvimentu destinu turístiku ida sei la hetan susesu no la sustentável bainhira laiha envolvimentu hosi grupu interesadu sira hotu.

“Ita hotu hatene, turizmu nu’udar indústria ho sistema ekonómiku, tanba ne’e nia atividade bele funsiona di’ak bainhira iha balansu entre oferta ho demanda ka entre produsaun ho konsumu,” Manuel Vong fó hanoin.

Tuir nia, atividade turizmu iha destinu turístiku ida labele iha monopóliu ka oligopóliu (oferta) nune’e mós labele iha monopsoniu ka oligopsóniu (prokura), tanba estraga sistema ekonomia sosiál merkadu iha destinu turístiku.

“Indústria turizmu sei lori impaktu pozitivu no negativu mai hamutuk maibé ita haree nia impaktu pozitivu turizmu mak hatama osan hosi estranjeiru ba Estadu, aumenta balansu pagamentu, promove dezenvolvimentu rejionál, diversifika ekonomia lokál no seluk tan,’ Asesór esplika.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!