Estudante Eskola EBC Bemmalaia Cordioja Manleuana selebra loron mundiál labarik
DILI, 01 juñu 2023 (TATOLI)—Estudante hosi Eskola Ensinu Báziku Sentrál (EBC, sigla portugés) Bemmalai Cordioja de Arcanjo, Manleuana, kinta ne’e, selebra loron mundiál labarik ho atividade oin-oin.
Diretór EBC Bemmalai Cordioja de Arcanjo, Cosme dos Santos Freitas, hateten, loron ohin importante tebes ba labarik sira iha mundu, liu-liu Timor-Leste tanba kada tinan iha loron 01 juñu mundu tomak selebra loron ne’e atu hakotu violasaun hasoru labarik.
“Ohin loron loloos feriadu, maibé ami-nia eskola deside labarik sira tama nafatin hodi selebra sira-nia loron iha eskola ho atividade animasaun sira hanesan jogu hadau malu kadeira, kadi kakutak no seluk tan,” Diretór eskola informa ba Agência Tatoli, iha ninia knaar fatin, EBC Bemmalaia Cordioja, Manleuna.
Notísia relevante : Timor-Leste sei selebra “Loron Mundiál Labarik” iha RAEOA
Nia dehan, atividade ne’ebé sira halo hanesan maneira ida atu eduka labarik sai matenek tanba labarik mak sai futuru ba nasaun.
“Ita-nia rai daudaun ne’e labarik barak mak la asesu eskola no halo atividade hanesan fa’an sasán no seluk tan, loloos ita tenke tau-matan ba labarik no kuidadu hodi fó eskola ba sira tanba sira ne’e sai fini ba nasaun,” nia akresenta.
Eskola Bemmalia Cordioja de Arcanjo estabelese iha tinan 2023, hahú hosi Pré-Eskolar to’o EBC iha estudante hamutuk 80.
Iha fatin hanesan, Estudante, Fiel de Jesus Pinto, sente haksolok bele selebra loron mundiál tanba sira-nia eskola halo animasaun barak.
“Ha’u kontente ohin selebra loron mundiál ba labarik,” nia dehan.
Loron mundiál labarik ne’ebé kada tinan sempre monu iha loron 01 juñu nu’udar selebrasaun bem komún no direitu labarik sira-nian iha mundu tomak, ne’ebé ninia selebrasaun hanesan parte ida hosi proklamasaun 1925 iha Jenebra liuhosi konferénsia mundiál kona-ba labarik sira-nia moris di’ak.
Loron mundiál labarik hahú hosi Pastór, Charles Leonard iha tinan 1857, ne’ebé momentu ne’ebá nia realiza servisu espesiál ba labarik sira iha igreja no sai hanesan ábitu ida hodi selebra kada tinan hanaran Rose Day.
Iha tinan 1949, Fedrasaun Demokrasia Internasionál Feto hasoru malu iha Rúsia no harii protesaun labarik mundiál dahuluk ka ohin loron koñesidu sai hanesan loron mundiál ba labarik (International Children’s Day).
Hahú hosi ne’e, loron mundiál ba labarik selebra iha mundu rai-klaran hahú iha loron 01 juñu 1950.
Organizasaun Nasaun Unida (ONU) dekreta loron mundiál ba labarik liuhosi deklarasaun direitu ba labarik, liuhosi Asembleia Jerál Nasaun Unida iha tinan 1959.
Iha Timor-Leste, liu-liu iha Konstituisaun RDTL artigu 10 kona-ba protesaun ba labarik-oan sira, iha alinea 1 hateten katak labarik sira iha direitu ba protesaun espesiál hosi família, komunidade, nomós Estadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun.
Iha alinea 2 haktuir, labarik sira hetan direitu hotu ne’ebé mundu rekoñese, hanesan direitu sira ne’ebé hakerek ona iha konvensaun internasionál, ne’ebé Estadu aprova no simu ona ka ratifika fila-fila.
Alinea 3 hateten, labarik hotu ne’ebé moris iha kazamentu nia-laran ka lae, iha direitu hanesan kona-ba protesaun sosiál.
Jornalista : Arminda Fonseca
Editora : Julia Chatarina
