MALIANA, 02 juñu 2023 (TATOLI)-Sekretáriu Estadu Formasaun Profesionál Empregu (SEFOPE), Alarico Rosário, sesta ne’e kolleta pateka ektare ida hosi grupu Ridus Enin iha bairru Utedai, aldeia Rihun Vila, suku Raifun, postu administrativu Maliana, munisípiu Bobonaro.
Notísia relevante: OJE 2023 ba SEFOPE aprova iha espesialidade
“Grupu ida-ne’e susesu, sira-nia rezultadu sai hanesan modelu ba Timor-Leste,” Alarico Rosário, hateten hafoin kolleta Pateka.
Diretora Nasionál Empregu Interiór, Clementina de Araújo Almeida, reforsa atividade kolleta Pateka ne’e foun primeira vez akontese iha munisípiu Bobonaro no sei implementa mós iha grupu agrikultura sira iha munisípiu hotu ne’ebé sai benefisiáriu hosi programa auto-empregu.
“Ne’e parte ida mós atu halo promosaun ba merkadu katak ita-nia grupu sira-nia produtu ne’e bele mós halo promosaun ba iha públiku atubele sosa produtu ne’e, tanba dalabarak grupu sira prodús barak, maibé dalaruma susar atu asesu ba merkadu,” nia dehan.
Nia subliña, atividade ne’e nu’udar kontinuasaun hosi apoia ne’ebé SEFOPE fó ba grupu auto-empregu refere iha tinan kotuk.
“Objetivu hosi programa ne’e ita fó fundu insentivu ba grupu auto+empregu ne’e oinsá sira-nia atividade bele asesu ba merkadu no kria sernisu ba sira nia-aan rasik, no atividade ne’e la’o ho di’ak sira mós bele fó fila-fali empregu ba ema seluk,” nia katak.
Benefisiária Grupu Auto-Empregu, Lucilia Robeiro, sente kontente no agradese ba SEFOPE tanba liuhosi programa ne’e bele tulun sira hadi’ak nesesidade uma laran.
“Sira-nia ajuda mak ohin loron ami bele kolleta Pateka ida-ne’e, tanba durante antes ajuda hosi SEFOPE ami halo lutu mak la di’ak, entaun ami halo to’os ida ne’e tinan hirak nia laran rezultadu iha maibé ladún di’ak, agora lutu iha di’ak ona,” nia haktuir.
Benefisiária ne’e salienta, prosesu kuda Pateka ne’e ho durasaun fulan-rua.
Enkuantu grupu Ridus Enin mós halo atividade produsaun iha área ortikultura hanesan kuda melon, pateka no ai-manas ho totál orsmentu ne’ebé apoia hosi SEFOPE hamutuk rihun $4,411.
Notísia relevante: Tempu Badak MTKI Sei Simu Termu Entrega Husi SEFOPE Hodi Jere Bee Manas Marobo
Jornalista: Sérgio da Cruz
Editór: Evaristo Soares Martins
