Xefe suku Lontas husu Governu foun muda PMOPA
BOBONARO, 05 junu 2023 (TATOLI)-Xefe suku Lontas, postu administrativu Lolotoe, munisípiu Bobonaro, Alipio Belo, husu ba Governu foun atu muda Programa Mao de Obras Postu Administrativu (PMOPA).
Enkuantu VIII governu konstituisionál implementa programa ne’e atu kapasita komunidade, empodera no hakbiit rekuparasaun ekonómika liuhosi aktividade limpeza iha área rurál no urbana, hamoso valeta, ateru no taka estrada kuak, hodi fasilita movimentasaun transporte públiku no atividade ekonomia.
Xefe suku Alipio konsidera programa ne’e di’ak tebes tanba maske ho valór orsamentu ne’ebé ki’ik, maibé benifísia direita ba komunidade hodi bele aguenta ba sira nia nesesidade ida loron balun.
Maibé lider lokál ne’e sujere atu di’ak liután mak governasaun foun tenke prioridade liu ba dezemvolve potensialidade ne’ebé suku no aldeia iha, nune’e komunidade bele hetan retornu ekonomia ne’ebé sustentável ba nesesidade uma-laran.
“Hau hanesan autoriade lokál nia haree, se bele Nono Governu kontinua implementa atvidade ida-ne’e, maibé tenke halo mudansa oituan, ninia aktvidade ne’e, ita labele mantein ho programa limpeza ne’e, se bele ita tama ho atividade, hakiak ikan, kuda ai-horis, kuda modo, kuda saburaka,” nia informa ba Tatoli, segunda ne’e.
Lider komunitária ne’e hatutan, daudaun ne’e implementasaun PMOPA faze dahuluk tinan 2023 iha suku iha ne’e emprega trabaladór hamutuk ema na’in-75.
Nia subliña, programa ne’e hahú iha loron 29 fulan maiu ne’e ho nia atvidade limpeza jerál, maibé atividade prioridade mak kuda ai-oan hosi prevene akontese dezastre naturál.
“Ha’u-nia planu ne’e atu halo lutu ida diresaun Zul-okho nian, rai ne’e risku maka’as iha tempu udan, movimentasaun transporte la diak, entaun ha’u planu halo komunidade lalin ai-halo lutu, hodi kuda au hodi halo prevenesaun ba rai-halai,” Xefe suku Alipio katak.
Entretantu tinan ne’e, Ministériu Administrasaun Estatál (MAE) aloka orsamentu hamutuk rihun $600 ba autoridade munisípiu Bobonaro hodi implemanta PMOPA. Hosi montante orsamentu ne’e fahe ba kada postu hetan rihun $100 hodi finansia atividade 282.
Nune’e kada postu hetan atividade 47 be’ebé sei emprega ema na’in+5,586, kada postu traballadór na’in-931 no aldeia na’in-20.
Jornalista: Sérgio da Cruz
Editór: Evaristo Soares Martins
