EDTL sei lansa projetu eletrifikasaun komunitária iha Faluai
MALIANA, 06 junu 2023 (TATOLI)-Eletrisidade Timor-Leste, Empreza Públika (EDTL,E.P), semana oin sei halo lansamentu ba implementasaun Projetu Eletrifikasaun Komunitária (PEK) iha aldeia Faluai, suku Leohitu, postu administrativu Balibo ho distánsia kilómetru 2,700.
Koordenadór EDTL,E.P munisípiu Bobonaro, Mario de Jesus, informa, iha fulan kotuk tékniku sira mobiliza ona poste 40-resin.
Notisia relevante: EDTL Bobonaro esforsu fornsese eletrisidade ba komunidade Balibo-Atabae
“Iha loron hirak oin mai, parese domingu semana oin, ami-nia tékniku sira dezloka ona ba instala liña komunitária ba benefisiáriu hamutuk uma-kain 47 iha aldeia Faluai,” nia informa ba Tatoli, iha Maliana, tersa ne’e.
Enkuantu PEK implementa dezde tinan kotuk no to’o agora EDTL,E.P munisípiu Bobonaro konklui ona projetu iha aldeia hitu kompostu hosi postu administrarivu Cailaco iba aldeia Pisularan, Lugululi no aldeia Asalaun.
Hosi parte postu administrativu Balibo iha aldeia Nunura, Bour, Sanirin Oemerese no Tualaran.
Jerente EDTL,E.P munisípiu Bobonaro ne’e haktuir, durante implementasaun projetu liña komunitária ne’e, Kkoperasaun serbisu entre tékniku no komunidade iha terrenu la’o ho di’ak tebes, maske hasoru difikuldade balun.
“Aldeia sira ne’e uluk la asesu eletrsidade, agora liuhosi projetu liña komunitária ne’e ita instala ona enérjia eletrisidade ba benefisiáriu kuaze uma-kain 500 resin mak asesu ona eletrsidade,” nia dehan.
Programa PEK ne’e EDTL prevee orsamentu Mao de Obra hodi fó insentivu ba komunidade sira atubele serbisu hamutuk ho tékniku sira liuliu mobilizasaun materiál tanba empreza Estatál ne’e nia tajetu katak iha fin de tinan 2023 aldeia hotu iha territóriu laran tomak tenke asesu ona enérjia elétrika
Jornalista: Sérgio da Cruz
Editór: Evaristo Soares Martins
