DILI, 06 juñu 2023 (TATOLI) – Ministru Edukasaun, Juventude no Desportu (MEJD), Armindo Maia, konsidera formasaun literasia iha saúde ba manorin sira importante duni, tanba sei promove saúde edukativa ida di’ak ba labarik sira.
Armindo Maia afirma ida ne’e iha ámbitu asinatura akordu entre Minitériu Edukasaun, Juventude no Desportu (MEJD), Ministériu Saúde (MS) no Mary Mackilop Today (MMT) hodi fó formasaun literasia iha saúde ba manorin sira iha Ermera, Ataúro, Liquiçá no Manatuto.
“Ha’u konsidera formasaun literasia iha saúde ne’ebé Mary Mackilop Today fornese ba profesór sira iha munisípiu haat ne’e importante duni, tanba kuaze iha eskola sira iha problema boot ida maka kona-ba bee-moos no hariis-fatin, tanba profesór no estudante barak maka seidauk bele uza fasilidade sira ne’e ho didi’ak”, Ministru Armindo dehan iha Vila Verde, tersa ne’e.
Formasaun literasia iha saúde ne’e nu’udar meiu ida atu hasa’e koñesimentu profesór no estudante sira-nian, nune’e sira bele kria jestaun ida di’ak atu organiza eskola sira, liuliu alunu sira hodi kontinua tau-matan ba infraestrutura eskola sira. Tanba eskola ida atu hetan ambiente saudavel ninia kondisaun eskola, prinsipalmente hariis-fatin tenke iha bee atu bainhira ema ne’ebé uza infraestrutura ne’e bele kontinua hamoos hodi bele lori saúde di’ak ba alunu no profesór sira.
Governante ne’e salienta bainhira infraestrutura sira ne’e laiha kondisaun di’ak, maibé kontinua uza nafatin sei fó impaktu ladi’ak ba ema nia saúde.
“Ha’u hatene katak eskola barak maka hetan ona apoiu ba fasilidade sira ne’e husi Ministériu Edukasaun nomós husi parseiru dezenvolvimentu sira, maibé fasilidade sira ne’e ha’u konsidera falta kanalizasaun bee ba eskola sira, tanba ne’e maka eskola sira hasoru problema boot ho bee”, nia realsa.
Ministru hatutan eskola bele organiza alunu sira atu lori rasik bee husi ida-idak ninia uma atu enxe ba hariis-fatin, nune’e sira bele uza iha tempu ne’ebé presiza hodi labele kria fali ambiente ne’ebé ladi’ak hanesan dois ka fo’er iha fatin sira ne’e.
Nune’e husi programa literasia iha saúde ne’e atu promove saúde edukativa ne’ebé di’ak liu ba labarik sira iha Timor-Leste.
Formasaun ne’ebé Mary Mackilop sei disponibiliza ba manorin sira ne’e foka ba sistema isin-lolon (sistema dijestivu, muskulár no eskelétiku), moras hada’et (malária no denge, tuberkuloza, infesaun respiratória aguda no seluk tan, moras la hada’et (fuma sigarru no droga), primeiru sokorru, jestaun lixu eskolár no seluk tan.
Notísia relevante: Mary Mackilop disponibiliza formasaun ba manorin 578 iha munisípiu tolu
Jornalista: Tomé Amado
Editora: Maria Auxiliadora