DILI, 15 juñu 2023 (TATOLI)—Deputadu hosi bankada FRETILIN, José Agostinho Sequeira ‘Somotxo’, kinta ne’e, entrega hikas karreta pajero sport ho sapa matrikula MP 88-55 ne’ebé durante ne’e nia uza hala’o serbisu iha lejislatura dalimak ba Parlamentu Nasionál (PN), tanba hela tan semana ida ninia mandate atu ramata ona.
Notísia Relevante: Lelaun karreta Prado desizaun iha plenária PN
“Ohin, hanesan mai entrega karreta Deputadu nian Parlamentu Nasionál ninian. Polítikamente sasán Estadu ka Parlamentu nian, ha’u laiha morál atu hela ho sasán ne’ebé pertense ba ha’u, tanba Deputadu foun sira sei mai iha loron 22 juñu. Balun sei entrega iha loron ne’eba, maibé ha’u babain mós la lori karreta ida-ne’e, para iha ne’e, no karreta ne’e lori ona mai ne’e, hanesan sosiedade sívil, povu no ita-nia militante sira labele ko’alia oioin. Ha’u iha konsiente no iha responsabilidade moral, Estadu ninia sasán mai entrega fila-fali tanba mandatu hotu la Deputadu ona,” Deputadu Somotxo hateten ba jornalista sira iha PN.
Nune’e, Deputadu Somotxo entrega xave karreta niana ba bankada rasik hafoin Deputadu sira foun mai iha lejislatura daneen entrega fali ba, hodi utiliza hala’o serbisu.
Nia hateten, loron ruma sei husu ba bankada hodi fó fila de’it karreta ninia sapa matrikula ne’e ba fali nia hanesan rekordasaun ba nia.
“Ha’u sei husu bankada hodi foti matrikula, tanba ha’u sente hanesan protesaun ida kuandu karreta ne’e foufoun ba Lospalos sinál ida iha. Ha’u sente ha’u-nia maun ida uluk ami la’o hamutuk iha ai-laran ne’e nia klamar karik, nune’e to’o iha Dili ba iha konsellu veteranu ninia fixa haree tinan moris 1955 iha 20 maiu. Númeru ne’e kona karreta, ha’u sente hanesan ha’u-nia maun nia klamar mak la’o hamutuk ho ha’u,” nia dehan.
Entretantu, nakait ba kestaun Deputadu balun hahú entrega hikas karreta Deputadu mai iha PN relasiona ho mandatu besik ramata, jornalista destakadu iha PN tenta konfirma ho Adjuntu Sekretáriu Adjuntu Parlamentu Nasionál, João Rui Amaral, maibé labele ko’alia asuntu ne’e no nia prefere di’akliu konfirma ho Sekretáriu Jerál PN de’it tanba asuntu lojístika no patrimóniu iha tutela sekretáriu jerál ninian.
Jornalista : Nelson de Sousa
Editór : Cancio Ximenes
