DILI, 06 juñu 2023 (TATOLI)—Prezidente Parlamentu Nasionál (PPN), Aniceto Longuinhos Guterres, hateten lelaun ba karreta Prado hamutuk 30 ne’ebé mai hosi lejislatura datoluk ne’e desizaun iha plenária PN.
Notísia Relevante: PN deside kansela sosa Prado, posibilidade Deputadu foun uza karreta privadu
“Imi hakarak halo nusa, kansela mak di’ak ka, ne’e ha’u halo tuir de’it imi. Ha’u baibain dehan beibeik ona, Prezidente Parlamentu ne’e votu ida de’it. Kuandu hola desizaun ne’e, ha’u labele dehan kansela ka la kansela. Ohin, ha’u dehan, tuir ita-boot sira (jornalista) ne’e tanba ha’u-nia opiniaun la’ós desizaun Parlamentu nian,” Prezidente Parlamentu Nasionál, Aniceto Longuinhos Guterres Lopes, hateten ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, tersa ne’e.
Nia hateten, Parlamentu Nasionál ne’e órgaun kolejiál no Prezidente Parlamentu Nasionál ne’e modera ka lidera de’it.
“Até mezmu, Konsellu Administrasaun para atu hola desizaun kona-ba kestaun administrativa, Prezidente Parlamentu laiha votu,” nia dehan.
Maibé, nia dehan, Prezidente PN iha dever tomak atu halo ajenda no promove diskusaun tuir Deputadu sira ninia pedidu ka aspirasaun.
“Ne’ebé to’o agora, ha’u halo ajendamentu sira-ne’e hotu hanoin ha’u mak hakarak ba ha’u-nia interrese ka ha’u atu halo alinesaun karrreta? Ha’u prosesa de’it saida mak Deputadu sira hakarak depois Deputadu sira tomak mak sei hola desizaun. Desizaun Parlamentu ne’e hanesan ita-boot sira hatene tuir votu,” nia hateten.
Antes ne’e, Prezidente Parlamentu Nasionál, Aniceto Longuinhos Guterres Lopes, mós hato’o ona katak lelaun ne’e hanesan forma jestaun patrimóniu, ba karreta hamutuk 30 ne’ebé mai hosi lejislatura datoluk nian.
“Se uza karreta tuan halo despeza Estadu boot liután, entaun ita halo ne’e mak jestaun. Se sosa karreta foun di’akliu duké uza karreta tuan halo despeza boot, ita lskon hela de’it, buat simples iha rai hotu-hotu halo. Ita Timor ne’e mak parese ita hakarak bisnis ho ofisina atu fó han ofisina sira-ne’e para sira explora Estadu. Entaun, ita tenke husik hela karreta tuan, dodok ona, hadi’a ba mós ladi’ak, osan gasta ba mós hanesan de’it,” nia dehan.
Maibé, tuir nia, lejislatura ne’e la ko’alia kona-ba atu sosa karreta foun no lejislatura foun mai mak sei deside atu sosa ka lae.
Nia dehan, hanesan Prezidente PN iha lejislatura ida-ne’e tenke halo jestaun ba patrimóniu Estadu ne’ebé lakohi husik todan ba fali lejislatura foun mai, liuliu entermu despeza Estadu.
“Tanba hanesan ita-boot sira akompaña, durante ha’u-nia mandatu tenta halo reforma ida hamenus despeza Estadu iha Parlamentu, ne’e rezultadu iha tiha ona orsamentu Parlamentu tinan-tinan kuandu antes ne’e aas loos. Iha ha’u-nia tempu ne’e komesa hatun, forma sira balun atu hatun ne’e mak ida mak ba manutensaun karreta sira osan ne’e aas tebes tanba karreta aat ka tuan mak barak, entaun atu hatun despeza ne’e forma ida mak ne’e,” nia hateten.
Posesu ida-ne’e hahu ona desde tinan kotuk Konsellu Administrasaun haree tiha ona problema ne’e no agora eleisaun parlamentár hotu ona tenke rezolve.
Nia hateten, lelaun ne’e lao tuir lei ka regra ne’e iha modalidade barak hanesan alineasaun ba públiku, ida fali lelaun mekanizmu limitadu bele iha PN de’it, Deputadu ka funsionáriu sira mak konkore, ida seluk alineasaun ho presu negosiadu tenke autorizasaun hosi Governu nian.
“Sira hosi Patrimóniu Estadu komesa mai halo inspesaun haree karreta nia kondisaun atu deteta loloos karreta ne’e nia presu hira. Klaru, ho ninia idade mós, nia tinan efetivu ne’e agora tama ona 12 ano” nia dehan.
Entertantu, antes ne’e iha loron 29 fulan-maiu tinan ne’e, meza PN ajenda iha períodu orden do dia ba diskusaun no votasaun projeitu rezolusaun númeru 131/V(5a)-aprova alienasaun viatura automové Parlamentu Nasionál, maibé ajenda ne’e la konsege diskute tambá kestaun balun nune’e adia ba tempu seluk.
Jornalista : Nelson de Sousa
Editór : Cancio Ximenes
