iklan

DILI, POLÍTIKA

PN deside kansela sosa Prado, posibilidade Deputadu foun uza karreta privadu

PN deside kansela sosa Prado, posibilidade Deputadu foun uza karreta privadu

Karreta Prado Parlamentu Nasionál. Imajen/Espesiál

DILI, 24 novembru 2023 (TATOLI)—Vise Prezidente Parlamentu Nasionál, Maria Angelina Sarmento, hateten PN deside kansela hodi hasai fali osan ne’ebé antes ne’e prevee iha proposta Orsamentu Jerál Estadu (OJE) 2023 atu sosa karreta Prado 30 tanba ho ezijénsia Aliansa Maubere Nasionál (AMN).

Notísia Relevante: PPN akompaña Bankada Parlamentár hala’o diálogu ho delegasaun AMN

Nune’e, nai dehan, posibilidade Deputadu foun na’in-30 iha lejislatura daneen mai ne’e, sei uza karreta privadu hodi hala’o serbisu loro-loron nian.

“Ne’e mak konsekuiénsia Deputadu ne’ebé mai tenke simu,” Vise PN ne’e hateten ba jornalista sira iha PN, kinta ne’e.

Dadaun ne’e, PN iha karreta 65 ba Deputadu sira maibé iha 35 mak foin daudaun sosa iha 2019 liuhosi orsamentu privativu, maibé karreta 30 kondisaun antigu tinan 10 ona hosi 2012 ne’ebé agora daudaun Deputadu sira utiliza nafatin.

“Karreta ne’ebé mais tinan lima kuandu ita uza nafatin nia konsekuénsia kustu ba manutensaun aas, tanba ne’e ita-nia regra Estadu ida-ne’e karreta ne’ebé mais tinan lima haree kondisaun la favorese ona tenke halo leilaun tama ba patrimóniu Estadu,” nia dehan.

Mezmu nune’e, Vise PN ne’e seidauk hatene karreta 30 ne’e atu halo leilaun iha lejislatura ne’e ne’ebé nia mandatu hela tinan ida, no prosesu antes leilaun tékniku mekániku halo uluk identifikasaun karreta ne’e nia kondisaun persentajen hira mak aat, bainhira 50% rekomenda bele hadi’a no 75% tama leilaun.

“Ne’e mak hau seida’uk hatene tanba asuntu kona-ba leilaun ka lae ho nia montante hira ne’e orsida deside iha konsellu administrasaun. Maibé antes konsellu deside ekipa tékniku mekániku sei halo uluk identifikasaun karreta ne’ebé merese no nia sistema bainhira laiha leilaun individu maibé ba públiku osan tama fali osan ne’e mak sosa fali,” nia esplika.

Tan ne’e, nia dehan, la’ós karreta hotu-hotu kada tinan PN sosa no iha karreta balun sosa iha 2012 to’o agora deputadu sira utiliza nafatin.

Notísia Relevante: AMN iha kestaun haat sei hato’o ba PN

Jornalista : Nelson de Sousa

Editór       : Cancio Ximenes

 

iklan
iklan

Leave a Reply

iklan
error: Content is protected !!