DILI, 21 juñu 2023 (TATOLI)–Governu liuhosi Ministériu Finansa (MF), Fundu Dezenvolvimentu Kapitál Umanu (FDCH, sigla portugés) no bolseiru timor-oan na’in-19 selebra kontratu hodi ba eskola iha universidade rua iha Indonézia.
Asina kontratu ne’e ba de’it bolseiru na’in-19, enkuantu seluk seidauk tanba laiha pasaporte.
Ministru Finansa, Rui Augusto Gomes, parabeniza bolseiru na’in-30 ne’ebé selesionadu hodi kontinua estudu nível diploma IV iha Sekolah Tinggi Ilmu Statistik (STIS) no Sekolah Tinggi Akuntansi Negara (STAN) iha Indonézia, ba tinan akadémiku 2023–2024.
“Fiar ba katak instituisaun ensinu superiór rua ne’e iha ona kredibilidade no prestíjiu. Ezemplu, STIS harii tinan 65 liubá no akumula esperiénsia no koñesimentu barak iha área estatístika no komputasaun estatístika, no prodús ona graduadu barak tebes to’o iha nível doutoramentu,” Ministru hateten iha ámbitu serimónia asinatura kontratu iha salaun Ministériu Finansa, Aitarak-laran, kuarta ne’e.
Asinatura kontratu ne’e hosi bolseiru rasik no hosi parte Governu asina reprezenta hosi Diretór Jerál Servisu Korporativu hosi MF, Joanico Pinto no Diretór Ezekutivu FDCH, Cristoóvão dos Reis, ne’ebé hetan sasin no akompaña hosi Ministru Finansa, Rui Augusto Gomes, Vise-Ministru Finansa, António Freitas, Diretór Institutu Nasionál Estatístika Timor-Leste (INETL), Élias dos Santos, Embaixadór Indonézia iha Timor-Leste, Okto Dorinus Manik, Reprezentante Komisaun Funsaun Públiku, inklui inan-aman bolseiru.
Notísia relevante : MESSK sei hakotu kontratu ba bolseiru 1,683 né ebé valór menus
Durante estudu, bolseiru sira sei hetan teoria 40% no esperiénsia prátika 60%. Iha parte teória, sira sei estuda álgebra, kálkulu, matemátika, ekonomia, demografia, estatístika no seluk tan, ne’ebé sei ajuda halo análiza ba dadus ne’ebé iha ho profisionál, integridade no imparsialidade.
Nune’e mós, STAN hanesan instituisaun ensinu superiór ida ho prestíjiu ne’ebé fó formasaun no treinu ema iha área kontabilidade, impostu, alfándega, jestaun finansa públika no jestaun patrimóniu.
“Ita hotu ne’ebé mak marka prezensa iha serimónia ne’e sai sasin ba asinatura akordu kontratu entre Governu Timor-Leste no bolseiru na’in-19 ne’ebé tuir planu sei bá Indonézia iha agostu 2023,” nia akresenta.
Biban ne’e, Ministru husu ba bolseiru sira atu hatudu maturidade no responsabilidade ba akordu ne’ebé mak asina, ne’ebé mós hatuur ona ho klaru kona-ba bolseiru sira-nia direitu no obrigasaun sira.
“Ha’u-nia lia-menon ba Bolseiru na’in-19 mak ita-nia nasaun presiza rekursu ne’ebé mak kompetente, profisionál, ho integridade no maduru iha nia komportamentu. Imi maka futuru rai ida-ne’e nian, tanba ne’e aproveita didi’ak oportunidade ne’e tamba oportunidade osan-mean hanesan ne’e sei la mai dala-rua,” nia hameno.
Aleinde ne’e, governante ne’e fó hanoin mós katak bainhira buka matenek iha ema-nia rai, nafatin hatudu komportamentu di’ak, tau a’as dignidade nasaun no sai mellór Embaixadór hodi promove liután Timor-Leste iha ema-nia rai.
“Enkuantu ba bolseiru na’in-11 ne’ebé seidauk bele arranka bá Indonézia tanba problema pasaporte, husu atu ita-boot sira pasiénsia no labele lakon esperansa tamba Ministériu Finansa no FDCH kontinua koordena ho Ministériu Justisa hodi buka solusaun ba problema ne’e,” Ministru promete.
VIII Governu Konstitusionál tau ema nu’udar sentru ba dezenvolvimentu, nune’e atu alkansa objetivu ne’e, Ministériu Finansa trasa estratejia hodi fó oportunidade ba foin-sa’e sira atu hasa’e kapasidade iha nível edukasaun formál.
Nune’e, iha agostu 2022, Ministériu Finansa Timor-Leste no Kementerian Keuangan Indonesia asina ona Memorandum of Understanding hodi haruka timor-oan sira ba hala’o estudu iha STIS no STAN.
Tuir Akordu ne’e, ba tinan akadémiku 2023, Ministériu Finansa no FDCH sei haruka Bolseiru na’in-30, ne’ebé hosi númeru ne’e, bolseiru na’in-15 sei ba kontinua sira-nia estudu diploma IV iha área statistik no komputasi statistik iha STIS, enkuantu restu na’in-15 sei ba hala’o sira-nia estudu diploma IV iha área kontabilidade, jestaun finansa públika no jestaun patrimóniu Estadu iha STAN.
Área estudu hirak ne’e importante tebes no aliña ho polítika reforma fiskál no jestaun finansa públika ne’ebé mak Governu Timor-Leste inísia ona desde tinan 2015 liubá no VIII Governu Konstitusionál kontinua implementa iha ninia mandatu ne’ebé sei ramata iha semana oin.
Ba tinan akadémiku 2024, Governu sei fó tan oportunidade ba bolseiru foun na’in-30, ho fonte finansiamentu nafatin mai hosi Orsamentu Jerál Estadu (OJE) 2024 ne’ebé sei aloka ba iha FDCH.
Embaixadór Indonézia iha Timor-Leste, Okto Dorinus Manik husu ba bolseiru sira atu aproveita tempu ho didi’ak tanba tempu sei la mai dala-rua, no garante katak universidade rua ne’ebé deside hosi timor-oan sira sei ba hala’o estudu kualidade di’ak tebes.
“Agradese ba Governu Timor-Leste tanba fó ona oportunidade ba joven timor-oan sira hodi ba estuda iha Indonézia. Atu dehan katak kapasitasaun rekursu umanu importante tebes iha nasaun, liu-liu hanesan preparasaun Timor-Leste adere ba ASEAN. Ha’u fiar katak universidade rua ne’e ho kualidade di’ak tebes, tanba ha’u rasik mak rekomenda, ne’ebé husu ba bolseiru sira atu aproveita didi’ak tempu hodi estuda,” nia fó hanoin.
Jornalista : Antónia Gusmão
Editora : Julia Chatarina
