PNTL prosesa ona oknum halo kobransa osan ba ema estranjeiru

DILI, 21 juñu 2023 (TATOLI) – Komandante Polísia Nasionál Timor-Leste (PNTL), Munisípiu Díli Superentendente Xefe Polísia Natercia Martins, hateten PNTL prosesa ona oknum polísia ne’ebé halo kobransa osan ba ema estranjeiru.
Kazu ne’e akontese iha segunda (19/6) foin lalais ne’e iha Manleuna iha oknum PNTL ida husu osan ba estranjeiru ida, selu tiha osan mak foin foti nian dokumentu karreta. Video ne’e viral ona iha rede sosiál.
“Durante ne’e ita hetan video ida hanesan ita hotuhotu akompaña iha mídia sosiál virál loos ne’ebé mak iha iha pesoál PNTL ida mak utiliza uniforme polísia nian hodi obriga ema atu halo buat ruma. Ita halo hela identifikasaun ba pessoál PNTL ne’e, nia prosesu la’o tiha ona, ita hein”, Superentendente Xefe Polísia Natercia Martins hateten ba jornalista sira iha Komandu PNTL Munispiu Díli Caicoli, kuarta ne’e.
Nia dehan, iha video ne’ebé mak virál iha rede sosiál entre pesoál PNTL ho ema estranjeiru ne’e laiha liafuan balun tendénsia ba krime.
“Hosi pessoál PNTL ne’ebé ita halo idetifikasaun individu PNTL, nia mós konfesa katak nia mak halo duni aktu sira ne’e no hato’o nia razaun balun, tanba ne’e prosesu krime ba pesóal ne’e lao no ba iha prosesu disipliñar ne’e ita la’o no ita hein”, Komandante PNTL Díli ne’e afirma.
Natercia Martins, hateten Komandu PNTL Díli mós bolu ona parte vítima hodi mai hato’o ninian informasaun sira atu halo kompletu.
Nia haktuir, ema individu ne’e tuir informasaun PNTL rekolla hosi ema balun katak ema ne’ebé halo asaun ne’e polísia, maibé sei iha hela investigasaun entaun Komandante ne’e lakohi aprofunda buat ruma.
Komandante sei la tolera kualker sé de’it atu individu, autoridade polísia tantu hosi militár balun ne’eb’e mak halo aktus ida ne’e nia tenke prosesa nia atu bele hetan konsekuénsia ida. Tanba fó imajen la di’ak ba instituisaun PNTL.
Jornalista: Natalino Costa
Editór : Zezito Silva

