SEFOPE Bobonaro rejista kazu disputa laborál hitu

MALIANA, 22 juñu 2023 (TATOLI) – Sekretaria Formasaun Profisionál no Empregu (SEFOPE) munisípiu Bobonaro, rejista kazu disputa laborál hamutuk na’in-hitu hahú hosi fulan- janeiru 2023 to’o agora.

“Ami simu keixa hosi traballadór sira mai hato’o ligadu ho sira-nia direitu ne’ebé maka hosi parte empregadór viola sira-nia direitu, entaun hosi janeiru mai to’o juñu, iha totál kazu hamutuk hitu,” Diretór SEFOPE munisípiu Bobonaro, Calisto Mau-Ati, informa ba jornalista sira, iha kna’ar-fatin, Soso, Maliana, kinta ne’e.

Kazu hirak-ne’e relasiona ho tipu kontratu, liuliu empregadór sira selu la tuir oras serbisu, no direitu traballadór ne’ebé la foti lisensa anuál, maibé kazu laborál hitu ne’e iha lima mak konsege rezolve ho meiu akordu koletivu, liuhosi negosiasaun tripartida entre traballadór, empregadór no mediadór.

Enkuantu kazu rua seluk dadaun ne’e iha hela prosesu nia laran, tanba hosi parte rua seidauk iha konkordánsia ba malu kona-bá atu selu direitu, maibé ida parte reprezentante impregadór informa ona katak bainhira Governu halo pagamentu ba projetu ne’ebé sira implementa sei selu traballadór ne’e nia direitu.

“Ami hadi’a fali, kazu ida-ne’e mós ami sei akompaña no halo aprosimasaun nafatin hosi parte trabalkladór no empregadór ne’ebé fó serbisu, sira iha ona konkoradánsia ba malu, mai fali ita fasilita halo prosesu mediasaun,” nia dehan.

Entretantu atu minimiza kazu disputa laborál labele akontese SEFOPE mós sosializa lei númeru 4/2012, 21 fevereiru, kona-bá lei traballu, ba entidade relevante sira hosi instituisaun estadu, empregadór no traballadór.

Diretór Calisto hatutan, meiu ne’ebé SEFOPE uza hodi halo orientasaun mak ba direita sira-nia serbisu fatin no ida seluk halo workshoop.

Jornalista   : Sérgio da Cruz

Editór           : Evaristo Soares Martins