SEKoop konklui ona distribuisaun Cesta Bázika faze daruak ba benefisiáriu 789.000
DILI, 22 juñu 2023 (TATOLI)–Sekretaria Estadu Kooperativa (SEKoop) konklui ona distribuisaun produtu Cesta Bázika faze daruak ba benefisiáriu 789.000.
“Relatóriu konklui ona iha fulan ne’e no entrega ona ba Ministériu Koordenadór Asuntu Ekonómiku (MKAE),” Sekretáriu Estadu Kooperativa, Elizário Ferreira, hateten ba Agência Tatoli iha ninia knaar fatin, Acait, kinta ne’e.
Notísia relevante : SEKoop koopera ho entidade relevante kontrola produtu Cesta Bázika iha Oé-cusse
Distribuisaun faze daruak ne’e iha reklamante hamutuk 5.000, maibé parte SEKoop labele fahe hikas tanba dadus laloos no presiza hetan fali verikasaun hosi Ministériu Administrasaun Estatál (MAE).
“Ami la selu ona tanba ita-nia relatóriu mós hatama ona,” nia akresenta.
Distribuisaun Cesta Bázika ba faze daruak ne’e SEKoop responsabiliza distribuisaun iha munisípiu Lautém, Viqueque, Baucau, Manatuto, Aileu, Ainaro, Manufahi, Covalima no metade balun hosi Rejiaun Administrativa Espesiál Oé-cusse Ambeno (RAEOA).
“Hosi munisípiu sira ne’ebé ami toma responsabilidade ne’e ita distribui Cesta Bázika faze daruak ho Orsamentu millaun $40, ne’ebé Governu aloka mai ne’e ita konsege ezekuta millaun $38 no restu filafali ba kofre Estadu,” Elizário Ferreira informa.
Jornalista : Arminda Fonseca
Editora : Julia Chatarina
