iklan

EKONOMIA, HEADLINE

Diretór Turizmu husu Governu foun tau prioridade partisipasaun iha Expo Osaka

Diretór Turizmu husu Governu foun tau prioridade partisipasaun iha Expo Osaka

Diretór Jerál Turizmu, Jelino Soares. Imajen Tatoli/Francisco Sony

DILI, 26 juñu 2023 (TATOLI)—Diretór Jerál Turizmu iha Ministériu Turizmu Komérsiu no Indústria (MTKI), Jelino Soares, husu ba Governu foun mai atu kontinua nafatin tau prioridade ba Timor-Leste nia partisipasaun iha Expo Osaka, ne’ebé sei realiza iha Japaun tinan 2025.

“Kona-ba Expo Osaka iha Japaun, Timor-Leste konfirmadu ona atu partisipa iha eventu ne’e tanba ita prienxe ona formuláriu partisipasaun no haruka ba ona komisaun organizadora Expo Osaka nian, nune’e husu ba Governu foun mai tenke tau nafatin prioridade ba partisipasaun Timor-Leste iha Expo ne’e rasik,” Diretór Jerál Turizmu hateten ba Agência Tatoli, iha ninia knaar fatin, Farol, segunda ne’e.

Notísia relevante : Timor-Leste konfirmadu partisipa Expo Osaka iha Japaun

Nia dehan, eventu ne’e sei fó benefísiu boot ba Timor-Leste, tanba nasaun barak bele hatene Timor-Leste nia kultura no riku-soin sira.

“Ita nia partisipasaun ne’e importante tebes, tanba antes ne’e ita partisipa ona iha Expo Dubai, ne’ebé antes ne’e maioria nasaun la hatene Timor-Leste, maibé ho prezensa iha Expo Dubai, ikus mai nasaun barak hatene no gosta produtu sira ne’ebé ita ba aprezenta. Entaun oportunidade ne’e importante ba ita atu lori tan Timor-Leste ba mundu, liuhosi promove ita-nia kultura no produtu sira tanba ita-nia produtu sira naturál no la uza kímiku,” nia akresenta.

Ba kestaun ne’e, MTKI koordena hela ho liña ministeriál sira hanesan Ministériu Agrikultura no Peska (MAP) no Ministériu Petróleu Minerál (MPM) hodi halo preparasaun no aprezenta produtu lokál sira iha espozisaun mundiál ne’e.

Daudaun ne’e, tékniku sira halo preparasaun di’ak tanba Timor-Leste iha rekursu naturál hanesan setór turizmu no produtu agrikultura hanesan kafé, ai-kameli no seluk tan.

Governu sei kria ekipa ba Expo Osaka 2025 hodi hili paviliaun ida hanesan uluk partisipasaun iha Expo Dubai.

“Kona-ba pavilliaun ne’e rasik, ita halo ona kontaktu ho komisaun organizadora Expo Osaka nian liuhosi ita-nia Embaixada Japaun iha Timor-Leste no oinsá ita atu hetan rekezitu sira hodi prienxe iha pavilliaun ne’e, tanba pavilliaun ne’e kompostu hosi A,B,C, ne’ebé pavilliaun C ne’e rasik ba nasaun sub-dezenvolvidu sira,” Diretór tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!