DILI, 28 juñu 2023 (TATOLI) – Ministériu Edukasaun Juventude no Desportu (MEJD) hamutuk ho Embaxada Japaun iha Timor-Leste inagura Eskola Bázika Sentrál Leusari iha Suku Serelau, Postu Administrativu Lautem, Munisípiu Lautem.
“Estudante mak futuru nasaun ida ne’e nian, imi kuidadu eskola foun ne’e atu bele uza ba tempu naruk”, Xefe Adjuntu Misaun Embaxada Japaun iha Timor-Leste Kazumi YAMADA, dehan liuhosi komunikadu ne’ebé Agência TATOLI asesu, ohin.
YAMADA hato’o ninia profunda gratidaun ba komunidade sira iha Suku Serelau no ba ONG FUNDAMOR ne’ebé konklui ona konstrusaun edifísiu eskola ne’e ho kapas tebes.
Projetu harii eskola ne’e, Governu Japaun apoiu osan ho montante $90,967 liuhosi ninia programa ida ho naran Fundu Asisténsia ba Projetu Komunitáriu no Seguransa Umana (GGP).
Liuhosi programa ne’e, konstrui ona edifísiu eskola foun ida ho sala aula tolu no sentina sira hodi fó benefísiu ba estudante hamutuk 250, profesór hamutuk 24 no funsionáriu eskola sira iha Eskola EBC Leusari.
Rekorda fali katak lansamentu ba projetu dahuluk ne’e iha tinan 2000, projetu hamutuk 136 mak implementa ona liuhosi eskema GGP iha Munisípiu 14 iha teritóriu Timor-Leste.
Projetu sira ne’e liuliu fornese asisténsia ba infraestrutura komunitária sira inklui konstrusaun no reabilitasaun ba fasilidades eskola, postu saúde sira no sistema abastesimentu bee-moos hodi responde ba komunidade sira-nia nesesidade báziku oioin iha nível baze.
Jornalista: Hortencio Sanchez
Editór : Zezito Silva
