DILI, 03 jullu 2023 (TATOLI)–Ministru Finansa sesante, Rui Augusto Gomes, entrega relatóriu ba atuál Ministra Finansa, Santina Cardoso, no fó rekomendasaun katak IX Governu presiza asegura kontinuidade servisu jestaun finansa públika.
“Lejizlasaun sira ne’ebé preparadu no balun iha hela sirkulasaun ba komentáriu mak lei tributária, lei prosedimentu tributáriu, lei ne’ebé aprova rejime jurídiku inspesaun tributária, lei dívida públika, lei ne’ebé regula apropriasaun públika, lei responsabilidade finanseira, lei ne’ebé aprova rejime benefísiu fiskál, lei Orsamentu Jerál Estadu (OJE) 2024 no lei impostu valór akresentadu,” Rui Gomes haktuir liuhosi relatóriu iha ámbitu transferénsia servisu, iha Ministériu Finansa, Aitarak-laran, segunda ne’e.
Nune’e mós halo revizaun ba customised non-US bond benchmark nomós equity factor mandates, revizaun ba Capitál Market Assumptions 2023 no revizaun ba estratejia investimentu fundu petrolíferu.
“Kolabora ho Timor GAP, Banku Sentrál Timor-Leste (BCTL, sigla Portugés), no Diresaun Jerál Tezouru hodi asegura emisaun deklarasaun finanseira no publikasaun relatóriu Fundu Petrolíferu tuir tempu. Emisaun T-Bond nu’udar fonte finansiamentu foun hodi bele finansia OJE no ajuda dezenvolve merkadu finanseiru iha Timor-Leste,” nia akresenta.
Notísia relevante : Kaleidoskópiu MF tinan 2022 iha área reforma jestaun finansa públika
Inísia prosesu estabelesimentu padraun kontabilidade ba setór privadu hodi hadi’a pagamentu impostu hosi setór privadu sira nomós bele insentiva dezenvolvimentu setór finanseiru iha Timor-Leste.
Kontinua emite kartaun Visa Credit card ba instituisaun Estadu restante iha 2024. Kontinua desentraliza funsaun jestaun finansa públika ba liña ministériu hotu noo kontinua ho implementasaun TileSW no espansaun interligasaun ho Asosiasaun Nasaun Sudeste Aziátiku (ASEAN) Single Window, nomós ho Komunidade País Lian Portugés (CPLP, sigla portugés).
Alende ne’e, kontinua apoiu adezaun Timor-Leste ba ASEAN no Organizasaun Mundiál Komérsiu (OMK), kontinua diskusaun téknika ho Autoridade Tributária, Autoridade Aduaneira, no BCTL hodi halo Interface SIGTAS – ASYCUDA, R-Timor no BCTL hodi fasilita e-Payment iha futuru.
“Halo avaliasaun ba full cycle PFM system no kontinua moderniza sistema jestaun finansa públika hodi asegura nafatin transparénsia no efisiensia. Konstrusaun Cozinha no morru ba Postu Integradu Fronteira, Tunubibi, Maliana,” nia adianta.
Public Expenditure and Financial Accountability (PEFA) instrumentu ne’ebé mak dezenvolve hosi Banku Mundiál fornese enkuadramentu avaliasaun no relata forsa no frakeza sira hosi jestaun finansa públika uza indikadór kuantitativu, avaliasaun PEFA ikus ba Timor-Leste halo iha tinan 2018 no 2019 ba períodu análise iha tinan2015, 2016, no 2017.
“Hosi avaliasaun PEFA, ikus hatudu katak maski progresu reforma hahú la’o ho neneik, kompara ho avaliasaun PEFA anteriór, maibé dezempeñu jestaun finansaa públikaa jeralmente la’o hakdasak (stalled) no iha área espesífiku balun dezempeñu att ka deteriorated,” nia afirma.
Avaliasaun ne’e hatudu katak indikadór 9 hosi indikadór hamutuk 31 mak hetan score C ka C+. Iha indikadór hamutuk 7 de’it mak hetan score liu padraun báziku (score B ka A), maibé indikadór hamutuk 15 mak hatudu sinál fraku (score D ka D+). Huoi dimensaun 94, dimensaun 55 mak score C ka liu no 38 mak score D1.
Maski ho dezempeñu nune’e, iha estudu balun ne’ebé hatudu progresu di’ak iha área jestaun finansa públika, purizemplu, International Budget Partnership (IBP), organizasaun ne’ebé promove jestaun orsamentu públiku ho responsável, efikásia no justu iha nasaun 120, iha nia estudu Open Budget Survey 2021 relata katak Timor-Leste nia score ba transparénsia orsamentál sa’e signifikativu ba 522.
Score ne’e sa’e pontu 12 husi score 40 ne’ebé Timor-Leste hetan iha 2019, kresimentu ne’e di’ak tebes no foin ba dahuluk akontese iha istória Timor-Leste, ho kresimentu ne’e, Timor-Leste konsege ultrapasa score média globál 45 husi 100 iha Transparénsia Orsamentál 2021. Avaliasaun husi Open Government Partnership iha 2022 konklui katak Timor-Leste kumpre ona kriteria ba partisipasaun tambá hetan score inísiu ho totál 81%3 maske Timor-Leste daudaun ne’e seidauk sai nasaun partisipante ida.
Score ida-ne’e ultrapasa score mínimu 75% atu elijível sai nasaun partisipante iha Open Government Partnership, relatóriu transparénsia fiskál 2022 husi Department of State, Estadu Unidu Amérika (EUA), hatudu katak hosi totál nasaun 141, Timor-Leste mak nasaun ida husi nasaun 724 ne’ebé mak kumpre ona rekizitu mínimu ba transparénsia fiskál.
Rekizitu mínimu ne’e inklui kumpre dokumentasaun orsamentu Estadu, kontratu Governu no lisensa ba estrasaun rekursu naturál. Aleinde ne’e, hosi tinan 2018 to’o 2021, rejista mudansa signifikativu iha implementasaun rekomendasaun sira hosi Kámara Kontas. Persentajen implementasaun rekomendasaun iha tinan 2018 no 2019 mak 46% no iha tinan 2020 sa’e ba 54%, no 67% iha tinan 2021.
Jornalista : Antónia Gusmão
Editora : Julia Chatarina
