Edukasaun Baucau husu benefisiáriu bolsa méritu kompleta dokumentu
BAUCAU, 12 jullu 2023 (TATOLI) – Serbisu Munisipál Edukasaun Baucau husu ba benefisiáriu bolsa méritu atu submete dokumentu komplementár hodi bele hetan apoia orsamentu liuhosi transferénsia bankária.
Diretór Serbisu Munisipál Edukasaun Baucau, Augosto Ornai Ximenes, esplika, liuhosi karta sikulár Ministériu Edukasaun, Juventude no Desportu (MEJD) fó-sai ona data determinante ba benefisiáriu sira to’o loron-31 fulan-jullu ne’e.
“Ami horisehik submete tan ona lista benefisiáriu ba nasionál, purvolta pursentu 70 mak ita submete ona, ita hein tan benefisiáriu seluk hatama tán, se lae osan sei fila ba kofre estadu,” Diretór Serbisu Munisipál Edukasaun Baucau informa ba Agência TATOLI iha Vila Nova, kuarta ne’e.
Totál Benefisiáriu hosi munisípiu Baucau hamutuk 1.500-resin, ne’ebé prosesa ona pursentu 20 no Serbisu Munisipál Edukasaun Baucau relata tan ona benefisiáriu pursentu 50 ba nasionál nune’e tempu besik sei transferénsia orsamentu ba benefisiáriu sira-nia konta bankária.
Kritéria hotu tenke prienxe tanba bazea ba orientasaun hosi ministériu no benefisiáriu hirak-ne’e hetan apoia orsamentu tinan-2022 nian, maibé realidade difikulta iha prosesu tratamentu dokumentu hanesan Billete Indentidade (BI) no kartaun eleitorál hosi inan-aman.
“Ami kontinua alerta liuhosi diretór eskolár sira maibé benefisiáriu barak mak seidauk hatama, ita hein katak sei kompleta iha loron determinasaun,” Augosto Ximenes akresenta.
Totál benefisiáriu hamutuk 1.500-resin kompost@ ensinu báziku kuartu, sestu no nunu anu, ensinu sekundária désimu primeiru no segundu anu inklui tékniku vokasionál désimu primeiru no segundu anu.
Kritéria atu sai benefisiáriu mak haree ba rezultadu nota hosi ezame nasionál válidu ba nonu anu ensinu báziku no segundu anu ensinu sekundária inklui tékniku vokasionál bazea ba unidade dezenvolvimentu kurríkulu ministériu mak deside.
Enkuantu ba ensinu báziku kuartu no sestu anu inklui ensinu sekundária no tékniku vokasionál désimu primeiru anu sei bazea ba valór notas ezame pasajen klase hosi klasifikasaun dahuluk to’o kintu klasifikadu.
Objetivu hosi bolsa méritu ne’e liuhosi orsamentu sei utiilza ba nesesidade eskola nian hanesan sosa materiál eskola inklui farda nune’e motiva estudante sira hasae liuhosi kapasidade iha prosesu aprendizajen.
Valor orsamentu ba kada benefisiáriu sira lahanesan komposta hosi $400 to’o $600 ba benefisiáriu valór ezame pasajen klase no benefisiáriu tuir ezame nasionál ho valor orsamentu hosi $500 to’o $1.000.
Jornalista : Natalino Belo
Editór : Evaristo Soares Martins
