Top

PNTL nakloke simu ideia hodi hadia

Komandante Jerál PNTL, Henrique da Costa. Imajen Tatoli/Francisco Sony

DILI 13 jullu 2023 (TATOLI) – Komandante Jerál Polísia Nasionál Timor-Leste Komisáriu Jerál Polísia Henrique da Costa, dehan komandu PNTL nakloke simu ideia bainhira atu hadia buat ruma.

“Ita hantene katak kontribuisaun juventude sira-nian, liuliu RENETIL nian ba Timor-Leste bo’ot tebes no membru RENETIL barak mós sai hanesan membru PNTL. Hosi ita-nia vizita ne’e husu RENETIL hanesan instituisaun ida fó sira-nia kontribuisaun liuhosi aspeitu saida. Buat ne’ebé ita husu mak ne’e, kuandu PNTL halo la loos, halo ladi’ak tenke hateten ba ami katak buat ne’ebé ita bo’ot halo la loos ladi’ak, para ami hadia”, Henrique hateten ba jornalista sira hafoin hasoru malu ho RENETIL, Farol, kinta ne’e.

Henrique afirma, atu dezenvolve PNTL, la’os depende de’it ba membru rihun-haat iha polísia nia-laran, maibé presiza kontribuisaun hosi ema hotu.

“Atu dezenvolve polisia ne’e laos depende deit ba ami nian rihun haat haat iha polisia nian laran, maibé presiza kontribuisaun hosi ema hotu hotu,” Komisariu Jerál Polísia Henrique adianta.

Iha fatin hanesan, Sekretáriu Jerál Rezisténsia Nasionál Estudante Timor-Leste (RENETIL), Joquim Fonseca, hateten RENETIL apresia tebes servisu PNTL liuliu iha tempu períodu eleisaun 2023 ne’ebé rezulta situasaun di’ak no kontroladu to’o eleisaun remata.

Fonseca husu ba Komandante Jerál PNTL atu fó korajen ba membru tomak atu hatudu servisu di’ak, mantein performa servisu instituisaun PNTL.

“Buat ne’ebé ami husu mak ne’e, Komandu PNTL tenke fó korajen nafatin ba membru sira atu PNTL hetan susesu, tenke kontinua nafatin ida ne’e no ba futuru buka no mellora nafatin servisu PNTL nian”, nia adianta.

Fonseca agradese tebes ba vizita kortezia ne’ebé Komandante Jerál PNTL Komandante Jerál PNTL Komisáriu Jerál Polísia Henrique da Costa, ho nia Segundu Komandante Jerál Komisáriu Polísia Pedro Belo iha sede RENETIL, Farol tanba ida ne’e nudar sinál atu hametin liután kooperasaun entre RENETIL ho PNTL.

“Vizita ida ne’e atu fortifika relasaun kooperasaun entre RENETIL hanesan organizasaun sosiadade sivíl ho PNTL atu ita hamutuk hadia ita-nia rai no ita-nia sosiadade”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!