PNTL Baucau husu membru arte-marsiál labele utiliza atributu iha fatin publiku
BAUCAU, 17 jullu 2023 (TATOLI) – Komandu Polísia Nasionál Timor-Leste (PNTL) munisípiu Baucau husu membru arte-marsiál atu labele utiliza atributu organizasaun iha fatin publiku.
Komandante PNTL Baucau, Superintendente Xefe, António de Sá, esplika, liuhosi enkontru entre lider organizasaun arte-marsiál no ritual inklui lider sub KRAM Baucau realiza akordu paktu seguransa hodi asegura estabilidade iha Baucau.
“Akordu liuhosi paktu seguransa la autoriza membru arte-marsiál atu utiliza uniforme bainhira partisipa serimonia funebre no la permite uza farda iha Igreja no fatin publiku,” Komandante PNTL Baucau hateten iha Vila Nova, segunda ne’e.
Alende ne’e, paktu refere hamosu konkordasaun pontu importante seluk hanesan organizasaun arte-marsiál no ritual tenke kumpre ho rigor ba segunda diretiva, lei arma branka hanesan hamosu pertubasaun orden publiku no utiliza arma branka.
Komandate ne’e husu atu lider organizasaun arte-marsiál no ritual sira tenke hanorin membru hotu ho kualidade no labele buka de’it kuantidade nune’e futuru bele kontribui ba paz no estabilidade iha Baucau.
“Ha’u husu treinadór sira tenke hanorin mos abilidade suave, labele fiziku de’it, se lae mentalidade anarkizmu de’it entaun laiha balansu,” Superintendente Xefe António de Sá akresenta.
PNTL kontinua hato’o apresiasaun ba organizasaun arte-marsiál hotu tanba sempre kolabora liuhosi maneira dialogu tanba konsidera hamutuk ho autoridade seguransa asegura ona estabilidade iha Baucau.
Total organizasaun arte-marsiál ne’ebé rejista sub KRAM Baucau hamutuk neen komposta hosi PSHT, IKS, KORK,Padjajaran, Perisai Diri, THS-THM no Seruling Dewata.
Jornalista : Natalino Belo
Editór : Evaristo Soares Martins
